Plie pyrda u BDO Mawkyrwat ïa ka Winter Festival ba la pynlong ha shnong Marshilong

Mawkyrwat, Kyllalyngkot 07: Kum shibynta jong ka jinglehkmen ha kane ka aïom tlang, ka Dorbar Shnong Marshilong ka la pynlong ïa ka Marshilong Winter Festival 2026 kaba la sdang mynta ka sngi ka 7 tarik u Kyllalyngkot, 2026 ha Madan Mawhiang, Marshilong, South West Khasi Hills District.
Ka jingthmu ba hakhmat eh jong kane ka Marshilong Winter Festival 2026 ka long ban kyntiew ïa ki sap jong ki Village Organization lyngba ki Self Help Groups (SHGs) la ka long lyngba ka kam shet kam tiew bad kiwei de ki lad, ban pynkhie im biang ïa ki jingïalehkai tynrai, ban don ka jingïatylli jingïalong kawei hapoh ka shnong ka thaw bad ban pynkhih jingmut ïa ki khun samla ba kin mih shakhmat ha ki jingïalehkai khnang ba kin lait na ki jingsniew kiba bun jait.
Lah ban kdew ruh ba ha kane ka Marshilong Winter Festival 2026 na ka liang ka Dorbar Shnong Marshilong ka la ïoh ruh ban pynbeit ïa shibun ki jait jingïalehkai kiba ban long ka jingpynbyrngia ïa ki paidbah nongshong shnong naduh ki khynnah rit haduh ki samla shynrang bad kynthei bad kumjuh ruh ïa ki longkpa longkmie kata naduh ka jingïalehkai Mawpoiñ, ka jingïakop-siat khnam, ka rwai phawer, ka jingïakop-pyni riam tynrai, ki jingbam tynrai bad ka jingïalehkai kynjatbol.
U kongsan ha kane ka sngi plie pyrda u dei u Bah I. Lawrynïang, MCS, Block Development Officer ka Mawkyrwat C&RD Block bad ha ka jingkren jong u, u la ai khublei kyrpang na ka bynta ka shnong baroh kawei kaba la pynlong ïa kum kane ka lympung ïalehkai ne ka Festival kaba long da shisha ka jingpynkhie im ïa ki jait jingïalehkai tynrai kiba la sdang duh jait bad ym tang kata, kumba la ïohi ba ki don ki Self Help Groups (SHGs) ha kaba na kane ka lympung ki longkmie ruh kin sa ïoh ka lad ban pyni paidbah ïa ki sap jong ki la ka long ha kane kano ka bynta ba ki ki ïa shimbynta.
Shuh shuh ula ai mynsiem na ka bynta ki paidbah jong ka shnong Marshilong ba ki dei ban don ka mynsiem jong ka jingïatreilang bad ïatylli ha kiba bun ki liang khnang ba kum ka shnong baroh kawei kan don hapdeng jong ka jingsuk jingsaiñ bad ban rad-dyngkhong ruh ïa ki jingsniew kiba ker sawdong na ka bynta ban pynjot ïa ki khun samla jong ka shnong.
Kiba la donlang ha kane ka long u Bah Kynpham V. Kharlyngdoh, Muktiar ka Supreme Court kum u Symbud Kongsan, u Bah G. Thongni uba dei u Myntri Shnong Marshilong uba la pynïaid ïa ka jingïalang lem bad ki ‘riew rangbah, ki longkpa ki longkmie, ki khun samla bad ki hep kiba rit jong ka shnong.