Mawkyrwat, Risaw 11: Ka Nonglang Sports Club (NSC) mynta ka sngi ka 11 tarik u Risaw, 2024 ka la ïoh ban plie pyrda ïa ka lympung ïalehkai kynjatbol kaba la tip kum ka Golden Jubilee Celebration Football Tournament 2024 ba la pynlong ha madan Pyndenïewlyngdoh, Nonglang, South West Khasi Hills District.
Lah ban kdew ba kane ka lympung ka long kum shinbynta jong ka jingrakhe ïa ka jingkynjoh jong ka Nonglang Sports Club ïa u maw mer ba 50 snem bad ha kane ka lympung ïalehkai ki don baroh 16 tylli ki kynhun kiba la wan ïashimbynta ban sa ïa khun bad mynta ka sngi ka 11 tarik u Risaw, 2024 la pynïalehkai sdang ïa ka Pynnoh Riwar Football Club pyrshah ïa ka Marskuiñ Sports Club ha kaba ka Pynnoh Riwar FC ka la jop da 2 – 0 kol.
Hapdeng jong ka jingïakhun, ka la long ka jingïakhun kaba itynnad bha ha kaba ki ‘rangïalehkai jong ki ar tylli ki kynhun ki la ïakhun tyngeh ban ïoh ban ïa pynkhih jar hynrei hapdeng ki jingpyrshang jong ki kiba bun ki la shu leh noh ei kai bad ka jingthmu jong ki kam shym la urlong. Hynrei ha ka jingïaid jong ki minit, ka Pynnoh Riwar FC da ka jingpyrshang ka la ïoh ban thep ïa ka kol ba nyngkong ha ka minit kaba 20 na u Teiborlang Ryntathiang kaba dei ha ka jingïalehkai jong ka kyllastep katba ïa ka kol kaba ar pat la ïoh ban thep da u Manbhakupar Iawphniaw ha ka minit kaba 63 kaba dei ha ka jingïalehkai jong ka kyllamiet.
Ha kaba kut jong ka jingïalehkai la ïoh ban sam ïa ka u ‘rangïalehkai batbit jong ka lympung kata sha u Teiborlang Ryntathiang jong ka Pynnoh Riwar FC.
U kongsan uba la wan ban plie pyrda ïa kane kane ka Golden Jubilee Celebration Football Tournament 2024 bad pynher ruh ïa ka lama jong ka Nonglang Sports Club u dei u bah A.L. Bareh, MCS, Assistant Commissioner, South West Khasi Hills District ha ryngkat u bah Kynpham V. Kharlyngdoh kum u symbud kongsan.
La pynshit pynshngaiñ ïa ka jingplie pyrda da ka jingshad na ki khynnah skul jong ka Bethel Secondary School, Nonglang.
Kiwei de kiba la donlang bad kiba la ai jingkren ki long u bah Syntarlin Snaitang, President jong ka Nonglang Sports Club, u bah Firsterlin Kharraswai, Myntri jong ka Shnong Nonglang bad u bah Kordorlyne Kharlyngdoh, Secretary ka Nonglang Sports Club kum u shongknor.
