Shillong, Nailar 26 : Ka HYC Nongkohlew Unit ha ka sngi Thohdieng ka la ïoh ban plie pyrda ïa ka 1st Tur Shaphrang Football Tournament 2022 ha madan Nongkohlew. Ha kane ka Tournament ki don baroh 16 tylli ki Team kiba la wan ban ïashim bynta.
La plie pyrda ïa kane ka Tournament da u Bah Donboklang Kharlyngdoh President HYC Mawlai Circle kum u Kongsan bad Bah Isaac W Basaiawmoit Assistant General Secretary kum u Symbud Kongsan ha ka jingïadon ryngkat lang ki nongkitkam jong ka Shnong Nongkohlew bad ki Nongkitkam ka HYC Mawlai Circle.
La pynïaid ïa ka jingïalang da u Bah Tarsit Wanñiang . Haba ai jingkren u Rangbah Shnong Bah Alfonse Kharwanñiang u la pdiang sngewbha ïa baroh ki team kiba la wan ïashim bynta ha kane ka Tournament, u da ai ruh ka jingïaroh ïa ka HYC Nongkohlew Unit ba ka la pynlong ïa kum kine ki prokram phutbol ka ban sei ïa ka sap ka phong jong ki samla kane ka dong bad ka thaiñ.
U Bah Isaac W Basaiawmoit u la ong ha ka jingïalehkai kan don ka jingjop bad ka jingshah jop, hynrei u la ong ba lada ki rem ruh kin nang ïai trei shitom ba ha kawei ka sngi kin sa poi beit sha ka thong. U la ong ruh ba ha ka jinglehkai lada don ka jingïabakla kim dei ban ïa buhnud, hynrei ki dei ban ïamap ïa klet noh.
U Bah Donboklang Kharlyngdoh haba kren kum u Kongsan u la ong, “Ka Jaidbynriew jong ngi ka la kiew ha ka phutbol, haba bun ki samla jong ngi, ki la don bynta ha bun ki football club jong ka Ri India, bad ka phutbol ha kine ki sngi kam long shuh kum ha ki 10 ne 20 snem ba la leit. Ki samla donsap ha ka phutbol mynta ki la im ja lyngba ka jingpyndon kam hok ka jong ki ïa ka sap ba ki don.”
“Ha ryngkat ryngkat ka phutbol, phi ki samla phi dei ban minot sa ha ki jingpule, kumjuh phi dei ban kiar na ki jingdih buaid kiba ktah ïa ka met ka phad bad ïa ka imlang sahlang,” la ong u Bah Donboklang da kaba kyntu ïa ka Nongkohlew Unit ba kan nang ïai pynlong ïa kum kine ki tournament.
Ha kane ka Sngi plie pyrda ka la don ka jingïakhun hapdeng ka Madan Mawkhar FC bad ka Mawsiatkhnam FC ha kaba ka Mawsiatkhnam ka la jop da shi kol la nod.
Ïa kane ka Tournament yn pynhap pyrda ha ka 3 tarik Nailur 2022.
