Mawkyrwat, Naiwieng 02: Ka Federation of Khasi Jaiñtia & Garo Peoples (FKJGP) Mawkyrwat Circle ha ka sngi saitjaiñ jong ka taïew ka 1 tarik u Naiwieng, 2025 ka la ïoh ban plie pyrda ïa ka lympung ïalehkai kynjatbol ba la tip kum ka 1st Invitation Knockout Football Tournament (IKFT) 2025 da ka ki buh ruh ïa ka phang, “Say no to Drugs, Yes to Football”, ba la pynlong ha madan Motmeron, Jakrem ha kaba u bah B. Kharjana uba dei u Additional Superintendent jong ki Pulit ka South West Khasi Hills District u la long kum u kongsan.
Ha kane ka lympung ïalehkai kynjatbol jong ka 1st Invitation Knockout Football Tournament (IKFT) 2025 ki don haduh 16 tylli ki kynhun kiba la wan ïa shimbynta ha kaba ka Wahlang Football Club bad ka Nonghahlait Football Club ki la long ki ar tylli ki kynhun kiba la ïoh ïalehkai ha ka sngi plie pyrda.
Haba phai ha ka jingïalehkai, ka Wahlang FC ka la ïoh ban thep nyngkong ha ka kyllastep bad haba wan phai ha ka kyllamiet pat ka Nonghahlait FC ka la ïoh ban pynphai shi kol ha kaba ka jingïakhun ka la long mar ïa khait bad mar shi kol. Kumta bad dei tad ha ka Tie Breaker ka Nonghahlait FC ka la tam noh 3 na ka 2 kol pyrshah ïa ka Wahlang FC.
Ha ka jingïalang ba lyngkot, u bah B. Kharjana ha ka jingkren jong u, ula ai ki kyntien jingsneng jingkraw ïa ki samla ba kum ki samla ki dei ban long kiba shimkhia ha kiei kiei kiba bha ym ha ki kam kiba pynjot ïa ka jingim jong ki, namar shibun ki samla ki la jah noh tang shiteng por ha shwa ba kin poi ha ka thong ka jingjop na ba ki ngop noh ha shibun ki jingdih ba pynbuaid.
“Ka jinglong samla ka dei ka por ba kordor haduh katta katta bad ban longbriew ha ka lawei la shai la shi sngi ka shong kumno pyndonkam ïa ka bor bad ïa ka por jinglong samla”, ong u bah Kharjana da kaba bynrap ruh ba bunsien ki samla ki pyndonkam bakla ïa ka por ha ka jingïashoh ïadat ha ki jingdih ba pynbuaid bad kiwei de ki kam kiba kjit bad tan ïa ka por bad ka bor jongki. Namarkata, kum ki samla lada ki kwah ban kiew ha ka jingim jong ki, ki dei ban jied ïa kaei kiei ba tei ïa ka lawei jong ki, namar kano kano ka kam kaba tei ïa ka lawei ka dei ka kam ba bha hynrei kano kano ka kam kaba pynjot ka dei ka kam ka ba sniew.
Kiba la ïa donlang ha kane ka sngi ki long u Kenesjune Lyngdoh Nonglait uba dei u President FKJGP South West Khasi Hills District, u bah Tensing Lyngdoh Nonglait uba dei u President FKJGP Mawkyrwat Circle, u bah Enborsing Syiemiong, Secretary, u bah Tebarsing Lyngkhoi, Sports Secretary lem bad kiwei de.
