Khliehriat, Jylliew, 10: U Waheh Shnong jong ka Ladrymbai Dongwah Bah Deibor Suchiang ha ka sngi Baar u la plie paidbah ïa ka MSBM Travel Agency kaba yn pynïaid da u Bah Marshal Biam kaba don ha Ladrymbai Dongwah East Jaiñtia Hills District.
Kane ka Travel Agency kaba don ha Ladrymbai kan ïarap shibun ïa ki nongleit nongwan ha kaba ki lah ban ot tiket bad wai ïa ki kali na kane ka Agency.
Haba kren kum u kongsan u Bah Deibor Suchiang u la kitbok kitrwiang ïa u Bah Marshal Biam uba dei u trai u ban pynïaid ïa kane ka MSBM Travel Agency namar kane kan pynshuk ïa ki nongleit nongwan kito kiba donkam ban leit sha ki jaka bapher bapher sha Assam bad kumjuh ruh shaduh Nepal.
U la pynpaw ruh ka jingsngew kmen halor kane ka jingmih shakhamt u samla rangbah uba na ka shnong Ladrymbai Dongwah uba la shim ïa kane ka synjam namar kane ka Travel Agency kan ïarap ym tang ïa ki nongleit nongwan hynrei kan ïarap ruh ha ka ïohkam ïohjam jong ki samla ka thaiñ.
U Bah Marshal Biam u la ïathuh ba kane ka MSBM Travel Agency centre kan ïarap shibun ïa ki nongliet nongwan bad na kane ka Agency Centre kaba na Ladrymbai ki kali kin kamai shaduh Ka laiñ, Badarpur, Cachar, Silchar, sha Guahati bad kin don ki kali ki ban kamai shaduh Nepal ruh, kumta u la kyntu ïa ki paidbah nongleit nongwan ba ki lah ban wan shim kali kamai ne lah ban leh booking na kane ka MSBM Travel Agency lada ki donkam ban leit sha kitei ki jaka.
Ka MSBM Travel Agency Centre ka don ka parking ha Ladrymbai Dongwah ha kaba ki kali kiba kamai sha kitei ki jaka sha Assam bad sha Nepal ki ieng ha kane ka parking.
U Bah Marsah Biam, u la ai khublei ruh ïa ka Jaiñtia Tourist Taxi Owners and Drivers Association kaba la ïarap ha kaba plie lad bad kyrshan lem ha kaba ïadei bad kane ka MSBM Travel Agency.
