Sohra, Naiwieng 19 : U Myntri Rangbah ka jylla u Conrad K. Sangma ha ka sngi Balang u la plie paidbah ïa ka Ramakrishna Mission College, Sohra, kum ka jingseng ïa ka Ramakrishna Mission College kaba nyngkong eh ha ka thain shatei lammihngi.
Ha kane ka jingïalang, la ïa donlang ki monk ba la kham rangbah jong ka Ramakrishna Mission ba kynthup ïa u Swami Achyuteshananda, Trustee jong ka Ramakrishna Math & Mission, Belur Math, Swami Anuragananda, ki nongmihkhmat paidbah ba kynthup ïa u Bah Balajied Kupar Synrem, MLA ka Shella, Bah Gavin Miguel Mylliem, MLA ka Sohra bad ki dkhot jong ka imlang sahlang, kaba long u mawmer ba kongsan ha jingpynïar ïa ka jingpule kaba kham shalor ha ka thain rilum jong ka jylla.
Ka kolej kan sdang da ka Arts bad Science streams bad ka thmu ban pynpoi ïa ka jingpule kaba kham shalor kaba lah ban ïoh bynta lang, kaba jem dor bad kaba ai jingmyntoi ïa ki samla jong ka Sohra bad ki distrik ba marjan.
U Myntri Rangbah ka Jylla Conrad K Sangma ha ka jingkren u la pynpaw biang ïa ka jingkut jingmut ba skhem jong ka sorkar ban pynkhlain ïa ka pule puthi, da kaba ong ba ka jingbei tyngka kaba khraw tam kaba kano kano ka imlang sahlang ka dei ban leh ka long ha ki briew, bad ba ka jingkyntiew ïa ki surok bad ki jingtei kam don jingmut ei ei lymda ki briew ki kiew shaphrang.
U la kren shaphang ki jingtei kiba la wan ha kine ki phew snem ha ka jinglong ka pule puthi jong ka Meghalaya, da kaba kdew ba watla ka jylla ka pynlut 15% na ka mang tyngka jong ka man la u snem-kaba kot sha ka 3,600 klur ha ka pule puthi. U la pyntip ha ka jingïalang ba ka sorkar ka la sdang ïa ka jingtreikam ban pynbeit ryntih ïa ki skul bad ka dang trei ban thaw ïa ka rukom treikam kaba kyrpang ban kyrshan ïa ki nonghikai ad-hoc bad SSA, ka ban wanrah ïa ka jinglong kaba kham ïadei bad kaba kham skhem.
Da kaba kyntu ïa ki nonghikai, ki managing committee bad baroh kiba don bynta ha kane ka kam ban peit bniah ïa ki khynnah skul haba shim ïa kano kano ka rai, u la ban jur ba ka lawei jong ka pule puthi ha Meghalaya ka shong ha ka jingïatreilang ban leh ïa kaei kaba bha tam na ka bynta ki khynnah.
U Myntri Rangbah u la pynthikna ruh ïa ka Ramakrishna Mission ïa ka jingkyrshan ba pura jong ka sorkar, da kaba pynbna ba yn pynbiang ïa ka jingpynïasoh bording sha baroh ki skul sorkar, skul shimet, kumjuh ha ki skul deficit bad ad-hoc, ha ka mission mode, bad ba ïa ki jingeh ha ka jingpynïasoh surok ba ki jaka pule ki ïakynduh yn pynbeit katba dang ïaid ka por.
U la pynshlur ïa ki samla pule ban bat ïa ki jinglong jong ka jingtrei shitom, ka jingsngewnguh, ka jinglong ryntih bad ka jingthmu, da kaba ong ba kine kilong ki nongrim ba kongsan jong ka jinglong nongshong shnong ba don ka jingkitkhlieh bad kum ki jinglong kiba kongsan jong ki jinghikai jong u Swami Vivekananda bad kiba la pyni nuksa ha ki jaka pule jong ka Ramakrishna Mission.
U Swami Achyuteshananda, haba ai jingkren, u la batai ïa kane ka jingplie kum ka por ba kongsan na ka bynta ka thain shatei lammihngi, da kaba kdew ba ka histori ka kynmaw ïa kaba nyngkong, bad ba ïa ka kolej Ramakrishna Mission ba nyngkong ha kane ka thaiñ la plie paidbah hapoh ka jingïalam jong u Myntri Rangbah ka Jylla Conrad K. Sangma.
U la ïaroh ïa ka Sorkar Meghalaya halor ka jingshimkhïa jong ka ïa ka pule puthi ha ki jaka nongkyndong bad ki thaiñ rilum bad pynpaw ka jingsngewskhem ba kane ka kolej ba thymmai kan pynduna shibun ïa ka jingjngai ban ïoh ïa ka pule puthi, ka jingban khia ha ka ïoh ka kot bad ka jingiehnoh shiteng por ïa ka jingpule.
U la bynrap ba ka kolej kan ym ai tang ïa ka jingnang jingstad ha ka pule puthi hynrei kan kyntiew ruh ïa ki nongshong shnong kiba don ka jingkitkhlieh kiba la don nongrim ha ka jingai jingshakri, ka jingkhlain bad ka jingsuk. Da kaba kdew ïa ka jingkren jong u Swami Vivekananda ha kaba u la ong “u briew u wanrah ia ka pule puthi,” u la pynskhem ba ka Mission ka thmu ban pynïar ïa ki jingnoh synñiang jong ka sha ka jylla Meghalaya lyngba ki jingïatreilang ha ka pule puthi, ki sienjam ban kyntiew ïa ka bor treikam jong ki nonghikai bad ki prokram kiba ïadei bad ki jingangnud jong ki samla ka thaiñ.
Hadien ki jingkren, ki samla pule na ki jaka pule bapher bapher jong ka Ramakrishna Mission ha kylleng ka Jylla Meghalaya ki la ai ïa ka Play Day Programme kaba itynnad. Ka jingpyni ka kynthup ïa ki drill, ki jingpyni yoga, ki jingkilan met kiba pyni ïa ka jinglong ryntih, ka jingïatreilang bad ka jingkoit jingkhiah ha ka met.
Ha kane ka jingïalang plie paidbah la don ruh ka jingplie ïa ka commemorative plaque bad ki jingpyni ïa ka kolshor.
