Khliehriat kyllalyngkot 20: U MLA jong ka Khliehriat, u bah Kyrmen Shylla mynta ka sngi u la plie paidbah ïa ka madan futsal ha shnong Dkhiah East bad Kane ka dei kawei na ki madan Futsal kaba la shna na ka skim jong ka District Mineral Foundation (DMF).
Haba kren kum u kongsan u bah Kyrmen Shylla u la ai ka jingia iaroh bad jingkhublei ïa baroh ki tnat treikam bapher bapher kynthup ruh ïa ki bor district jong ka East Jaiñtia Hills District kiba la ïa don bynta lang ha kaba shna ïa kane ka madan futsal ha shnong Dkhiah East, u ai khublei ruh khamtam ïa ki nongpynïaid shnong kiba la ai ka jingiatreilang haduh ban da lah ban pynlong ïa kane ka project kaba jop, u la ong ba ka jingiadon bynta lang bad ka jingiatreilang ka long kaba donkam bha ha kaba kyntiew ïa ka longbriew man briew.
U bah Kyrmen Shylla u la pynpaw ba u long la kloi ban ai shuh shuh ki jingiarap kumba u la ioh ïa ka jingai jingmut na ki shnong ki thaw ha kaba kyntiew ïa ki kam lehkai sports bad u la kular ban theh jingiarap halor ki jingdonkam jong ki paidbah ha ki kam ialehkai sports kaba long ruh kum ka jingkyntiew bad jingpynkup bor ïa ki samla jong ka district hi baroh kawei.
Ha kaba ïadei bad kane ka madan futsal ha Dkhiah, u kongsan u la ong ba kane ka madan kan long kawei na ki bynta ba kongsan bha ha kaba kyntiew ruh ïa ka koit ka khiah da kaba pynbyrngia ha kaba ialehkai ha kane ka madan namar ka madan ialehkai kam mut satia tang ïa kito ki rang bad thei ialehkai sports kiba donsap ban kyntiew shuh shuh ïa la ki sap hynrei ka madan ka dei ruh ka thymmei kaba long ka jingaimynsiem bad pynshlur ïa kiwei kiwei ruh wat ïa kito kiba la san la rangbah ba kin ialehkai bad pynbyrngia ïa lade kaba lah ban iarap ïa ki ha kaba kyntiew ïa ka koit ka khiah bad ka jingbit jingbiang ka met ka phad.
Shuh shuh u kongsan u kyntu ïa ki nongshong shnong bad ki bor pynïaid shnong ba kin shimti ïa kane ka madan kum ka kawei na ka jingdon kaba kordor hapoh shnong bad u la ai jingmut ruh ba ïa kane ka madan dei ban da pyndonkam bha ha ka rukom kaba dei ba ka shnong kan lah ban kamai pisa na ka bynta ka jingbit jingbiang ka Dkhiah East Football Club bad u kyntu ruh ban ri bad sumar bha ïa ka madan
U Sub-Divisional Officer (SDO) Sadar, East Jaiñtia Hills District, u Manish Kumar, IAS uba la ïa don lang ha kane ka sngi ba plie ïa ka madan ha Dkhiah East, u la ai ka jingkhublei ïa u MLA Khliehriat bad ka tnat Sports ki ba ju ai jingmut ha kaba ïadei bad ki kam kiba donkam kiba pyntrei lyngba ki skim DMF kynthup ruh ha kaba kyntiew ïa ka Sports, u la ai ruh ka jingiaroh ïa baroh ki tnat treikam kiba ïa don bynta lang ha kaba shna ïa ki madan futsal hapoh ka district, u la ai ka jingkhublei kitbok kitrwiang ïa ka shnong Dkhiah East kaba la ioh ïa kane ka madan.
Shuh shuh, u Manish Kumar u la ai ka jingiaroh ïa ka jingitynnad ka jylla Meghalaya bad ong ruh ba ka dei ka jylla ka riewspah ha ka jingdon ka mariang ba itynnad kaba khring ïa ki nong jngohkai pyrthei bad ka riewspah ruh ha ka jingdon ki marpoh khyndew, u la bynrap da kaba ong ruh ba ka East Jaiñtia Hills District ka don ïa ka bynta kaba kham pher namar ka jingdon ki marpohkhyndew bad ka mariang ba itynnad, kaba wanrah jingiohnong ïa ka district na ka jingdon ki marpoh khyndew ha kaba ki bor district ruh ki lah ban leh ïa ki kam kiba don jingmut hapoh ka district ha kaba kyntiew ïa ka district da kaba ioh lyngba na ka bhah jong ka District Mineral Fundation (DMF) bad pyntikna ba ka imlang sahlang kan nym shah iehnoh shadien ha ka jingiaid lynti ban kyntiew ïa ka imlang ka sahlang hapoh ka district.
Kiwei pat kiba la ai jingkren ki kynthup, ka MDC Rymbai- Kliehriat, ka kong Violet Lyngdoh bad u Rangbah Shnong Dkhiah East, u bah P. Nongtdu bad la ïa don ryngkat lang ka District Sports Officer (DSO), East Jaiñtia Hills District, ka kong S. M Rapsang, u bah Krison Langstang lem bad ki dkhot shnong.
