Nongstoiñ, Nailur, 18: Ha ka sngi saitjaiñ u bah Gabriel Wahlang MDC ka Nongstoiñ konstitwensi ha ka jingïasynranlang u bah L.G.Nongsiej MDC barim ka Nongstoiñ konstitwensi, u la ïoh ban plie paidbah noh ïa ka jingkieng kaba pynïasnoh na ka shnong Tiehsaw sha ka shnong upper New Nongstoiñ kaba dei ka jingkieng ïaid kjat kaba la shna ha ka jingpynlut kaba 26 lak tyngka lyngba ka KHADC.
Katei ka jingkieng ka dei kaba don ha ka shnong Tiehsaw kaba marjan bad ka skul KJP Nongstoiñ. Ka la long shisha ka jingmyntoi bad ka jingkyrkhu kaba khraw na ka bynta ki khynnah skul, kiba hap ban ïaid lyngba katei ka wah, khamtam ha ki aïom lyiur ka long kaba eh bad ka bym lah ban kam sha shilliang wah, namar ka jingheh jong ka um.
Kum ka dak jong ka jingplie paidbah, u bah Gabriel Wahlang ha katei ka sngi u la ïoh ruh ban khap ïa u ribbon bad ban plie ïa u mawthoh kyrteng scheme. Ïa ka jingïalang la pynlong ha phyllaw jong ka skul KJP hapdeng ka jingsakhi lang jong ki paid nongshong shnong jong ka shnong Tiehsaw bad kiwei kiwei bad la pynshit pynshngaiñ shuh shuh ïa katei ka jingïalang da ka jingrwai jong ki khynnah skul.
Ha katei ka sngi la ïadonlang ruh kiwei kiwei ki riew rangbah jong ka thaiñ kaba kynthup ïa kiba na ka shnong Upper New Nongstoiñ bad la pynïaid ïa katei ka jingïalang da u bah Moon Dkhar sordar ka shnong Tiehsaw.
