Plie paidbah u Conrad ïa ka skul ban ïakhun pyrshah ïa ki lehnoh ka CIAT bad ka IPWC ha Baghmara

Baghmara, K’Lyngkot 20: U Myntri Rangbah ka jylla u Conrad K. Sangma mynta ka sngi u la plie paidbah ïa ka Counter-Insurgency-Anti-Terrorism (CIAT) School bad ka Integrated Police Welfare Complex ha Baghmara, South Garo Hills.
Haba kren ha kane ka jingïalang u Conrad K. Sangma u la ai khublei ïa ka tnad kam poh ïing halor ka jingpyndep ïa ka Integrated Police Welfare Complex bad ïa ka CIAT School.
Da kaba kubur ïa ka jingïohi jngai kaba don ha lyndet jong kane ka projek, u la ai ka jingïaroh ïa u Superintendent of Police uba mynshwa bad uba long mynta u Inspector General of Police, u Davis N. R. Marak.
“Nga shim ïa kane ka kabu ban ai khublei ïa u na ka bynta ka jingiohi jngai bad ka jingthmu bad ka jingkut jingmut ban ïaid shakhmat bad kum kane ka projek kaba kongsan, wat hapdeng ki jingeh kiba u la ïakynduh ha ka jingïaid lynti ka jong u”, la ong u myntri rangbah.
U la pynpaw ruh ïa ka jingsngewnguh ïa u myntri ka tnad kam pohïing ha katei ka por uba long mynta u myntri ka tnat pule puthi u bah Lahkmen Rymbui bad ka kynhun jong u kiba la ai jingmynjur ban ai shuh shuh ïa ka pisa ban pyndep ïa kane ka kam.
U Myntri Rangbah ka jylla u la kdew ba ka jaka kaba biang bha jong kane ka complex ban ai jinghikai ym tang ïa ki Pulit ka Meghalaya hynrei wat ïa ki pulit na kylleng ka ri India bad nabar ri.
“Ka counter-insurgency and anti-terrorism school ka ïoh jingmyntoi na ka jingdon jong ki khlaw kiba rben, ka jinglong ka suiñbneng kaba jynjar, bad ki jaka kiba eh, kaba pynlong ïa ka kum ka jaka kaba biang tam na ka bynta ki prokram ai jinghikai ne ki training,” u la ong.
Ha kane ka complex ka don hynriew tylli ki bynta kiba kynthup ïa ka Hospital bad Dispensary jong ki Pulit, ka Officers’ Mess, JCO Mess, Police Welfare Training Centre, Sports Complex, bad ka Recreational Centre.
La pyntreikam ïa kane hapdeng u bnai Rymphang u snem 2022 bad u bnai Kyllalyngkot 2026, kane ka jaka ka pyni ïa ka jingkut jingmut jong ka sorkar ban kyntiew ïa ka jingtrei kam ka jingai jinghikai kaba katkum ka juk bad ka jingbha jingmiat jong ki pulit.
Ha kane ka sngi la wan ban ïa don lang ruh da Symbud Myntri Rangbah ka Jylla ba bat ïa ka tnad kam poh ïing u Bah Prestone Tynsong, u Myntri ka tnat Pule Puthi u Bah Lahkmen Rymbui, ka Director General of Police ka kong I. Nongrang, u Chief Secretary u Dr. Shakil P. Ahammed, ki heh ophisar nalor kiwei pat.