Plie paidbah u CEM-JHADC ïa ka ophis treikam jong ka tnat Taxation ha Khliehriat EJHD

Khliehriat, Nohprah 10 : U CEM jong ka Jaiñtia Hills Autonomous District Council u bah Thombor Shiwat, mynta ka sngi u la plie paidbah ïa ka ophis treikam kaba dei jong ka tnat Taxation ha Khliehriat East Jaiñtia Hills District bad la khmihlynti ba ka jingdon kane ka ophis treikam kan pynsuk ïa ki paidbah kiba na East Jaiñtia Hills District kiba donkam ha ki kam kiba iadei bad ka Taxation ha kaba kim donkam shuh ban leit shaduh Jowai ban pyndep ïa ki kam jong ki.
Haba kren ha ka jingialang, u bah Thombor Shiwat u la pynpaw ba u khmihlynti ba da ka jingiatreilang ki kam ki jam kin long kiba ïaid beit ïaid ryntih khlem da thew ïa kino kino ki jingduna kum ki briew u la ong ruh ba “Nga don ka jingkyrmen ba lyngba ka jingtrei shitom jong ki officer bad ki nongtrei kiba don ha kane ka tnat Taxation ha East Jaiñtia Hills kan long kaba seisoh, nga kyntu ïa ki nongtrei ba kin sngewbha ban trei da ka lynti kaba khuid, trei da ka lynti kaba bha, ba miat khnang ban long ka burom bad khnang ban long kata ka tnat treikam kaba la seng nongrim thymmai hangne kaba don ka burom ,don akor bad lada ka long ka tnat kaba ïaid beit ïaid ryntih ha ki kam ki jam kanne kan pynshlur bad pynlong ïa ngi bad ki heh ka JHADC ban wanrah shuh shuh sa kiwei kiwei ki tnat treikam hapoh kane ka district kaba dei ka district kaba paw khmat bha, ngeit ba da kane ka jinglam lynti jong kane ka tnat Taxation kum ka jingsdang kan long ka bor ka lynti ban plie shuh shuh sa kiwei kiwei ki tnat treikam ha East Jaiñtia Hills District”.
U bah Thombor Shiwat u la pynpaw ka jingsngewsih namar ba don uwei u officer jong ka tnat uba ngat ha ki jingshah pynshitom kaba ym lah ban tip shuh na kaei ka daw, kumta u kyntu ïa u officer bad ki nongtrei kiba dei ha kane ka tnat Taxation ba kin long kiba phikir bha bad ong ba “kino kino ki ophisar kiba peit sngewbha dei ban long kiba phikir bha ban lait na kano kano ka jingbakla, ngim kwah ba kano kano ka bym sngewtynnad kan mih lada wan ka Audit kaba peit ïa ki jingkheiñ jingdiah, namar busniem ka tnat Taxation ka ju bun bha ki kynrum ki kynram bad ka daw ka dei namar ba ym lah ban pynbiang ïa ki jingkheiñ jingdiah bad bunsien ka kaiphot jingkheiñ ka dei ka bym iahap jingkheiñ ha ka jinglum ïa ka pisa bad ka jingpyn poi ïa ki pisa sha ophis,te kum kine kiei kiei kim dei shuh ban jia nangne shakhmat”
Ha kaba iadei bad ka jingpynbit pynbiang shuh shuh ïa katei ka ophis treikam ha Khliehriat u la ong ba la i donkam ban shna ruh ïa ka jingker ne fencing sawong kane ka ophis bad ka jaka kaba dei jong ka District Council bad halor kane u ong ba un sa phah ïa u Engineer ban jurip ban sngewthuh ïa ka jinglut jingsep.
Kum u kongsan uba plie ïa kane ka tnat ophis Taxation u la ai ka jingkhublei kitbok kitrwiang ïa ki nongtrei bad kumjuh ruh ïa ki riew rangbah kiba na East Jaiñtia Hills District bad u khmihlynti ruh ba kan don ka jingiatreilang na ka bynta ban pyn tyllun ïa ki kam.
Ha kane ka prokram, u Waheh Shong Khliehriat West, u bah Justine Dkhar bad u Waheh Shnong Khliehriat East, u bah Kedius Rymbai ki la aiti ruh ïa ka dorkhas ha u CEM ka JHADC bad ha ka dorkhas ki la kyrpad ïa JHADC ba kan sngewbha ban wanrah noh sa kawei ruh ka tnat treikam kaba donkam ka tnat Revenue bad ban buh noh kawei ka skul DC-L.P School ha Khliehriat bad la pynpaw shuh shuh ba ka East Jaiñtia Hills ka dei ka thaiñ kaba don bun bha ki marpoh khyndew kum u dewiong, u mawshun, ki khlaw ki btap kiba itynnad, ki karkhana saiñ dewbilat, ki karkhana Coke bad ka dei ruh ka thaiñ kaba don bun bha ki briew kiba na bar kiba wan seng kam seng jam hapoh ka district lyngba ka jingai jingbit ka JHADC bad kine baroh ki dei kiba pyn iohnong bha ïa ka District Council bad kumjuh ruh ïa ka sorkar jylla bad ha kajuh ka por ruh lada don ki ophis treikam bad ka skul kin iarap ban wanrah ïa ka jingiajan jong ki paidbah bad ka District Council.
Kiba la ai jingkren ki kynthup ruh u Deputy CEM ka JHADC, u bah Lasky Rymbai, ka MDC Rymbai-Khliehriat, ka kong Violet Lyngdoh, u E.M Incharge Taxation JHADC, u bah J.Suiam, u Waheh Shnong Khliehriat West, bah Justine Dkhar bad kiwei kiwei.