Plie paidbah u Bah Samlin ïa ka madan phutbol ba kot T. 51 Lak ha Lenmawtap A Sohïong

Shillong, Nailur 19 : U Bah Samlin Malngiang MLA ka Sohïong constituency ha ka sngi Nyngkong ka 19 tarik Nailur 2022 u la plie paidbah ïa ka madan ïalehkai phutbol kaba la shna bad ka gallery ha Lenmawtap A sohïong.
Ïa katei ka madan kaba kot sha ka 51,86,500 tyngka u MLA u plie paidbah ha ka jingïadonlang u MDC Bah Sherbor Mawlong, BDO ka Sohïong C&RD Block Bah B Sungoh, Lyngdoh ka Sohïong Bah BL Thabah, Sordar Shnong, Secretary Shnong, ki riew rangbah longkmie longkpa ki samla haduh ki hep kiba rit.
Shwa ba ka shnong Lenmawtap A Sohïong kan ïoh ïa katei ka madan, u MLA bad BDO ha ryngkat ki nongkitkam shnong ki la shah kynnoh pyndonkam bakla ïa ka pisa ha kaba ki la shah ujor ruh da ka FIR. Ïa katei ka madan kaba la pruid dak naduh u snem 2012 la sdang ban shna ha u snem 2020 hynrei namar ka jingwan lyngshop ka khlam Covid bad ruh ka jingmih ka jingshah kynnoh bamsap katei ka madan ka la sahteng noh hynrei dei ha ka 13 tarik Naitung 2022 ïa katei ka madan la lah ban pyndep.
U Bah Samlin Malngiang haba ai jingkren kum u Kongsan u la ai ka jingïaroh ïa ki nongkitkam Shnong kiba la trei shitom watla hapdeng ki jingeh kiba bun ba ki ïakynduh ha kaban pynurlong ïa katei ka madan. U la ong ba kum u nongmihkhmat u dang don shibun ki kam ban leh na bynta ban wanrah ka roi ka por hapoh ka constituency.
U la ong ruh ba katei ka madan kam pat biang hynrei ka donkam ban dang kham pynbha ha kaba u la kular ruh ban shna da ka gallery ban tap ruh da ki tin sawdong jong ka madan. Nalor kata u la kular ruh ba ïa katei ka madan yn tei da ka mini stadium da kaba ong ba lyngba kane kan long ka jingkyrkhu ïa ki paidbah khamtam ïa ki samla ïalehkai.
Kadei ruh ka madan kaba nyngkong ha ka shnong Sohïong jong ka Sohïong constituency ba kan ïoh ïa katei ka madan kaba paka kaba lah ruh ban pynlong ïa kiba bun ki tournament, kum ki inter school, inter dong nalor kata ruh kiwei kiwei ki prokram kum ki jingïalang paidbah, jingïaseng bad kiwei kiwei kiba ai jingmyntoi na bynta ki paidbah nongshong shnong.
Ha kane ka sngi la ïoh ruh ka jingkren na u MDC, BDO, Lyngdoh ka Sohïong kiba la ai khublei ïa ki nongkitkam shnong bad kyntu ïa ki paidbah ba kin sumar bha ïa katei ka madan. La pynshit pynshngaiñ ruh ha kane ka sngi plie madan da ki jingrwai bad ki jingshad na ki samla jong ka shnong.