Plie paidbah ka Myntri Sorkar Pdeng ba dei khmih ïa ka tnad Kam Pla Tyngka ïa ka skhim NPS Vatsalya
SHILLONG, Nailur : Ka Myntri Sorkar Pdeng ba dei khmih ïa ka tnad Kam Pla Tyngka, Nirmala Sitharaman ka la plie paidbah ïa ka skhim NPS Vatsalya mynta ka sngi, kaba kyntiew ïa ka jingsngewthuh ïa ki kam pisa bad ka jingkynshew pisa da ki samla jong ka India.
Kum shi bynta kane ka jingpyllait paidbah, ka la pynbna shaphang ka rynsan online ban ïasoh lang ha kane ka skhim bad ka la pyllait ruh ïa ka jingthoh ai jingbatai shaphang kane ka skhim. Shuh shuh ka la sam ïa ki Permanent Retirement Account Number (PRAN) card sha ki khynnah kiba rung thymmai hapoh kane ka skhim ha kane ka sngi.La pynlong ruh ïa ka prokram ai jingtip da ka State Level Bankers’ Committee (SLBC) Meghalaya bad NABARD, ïa kumba 100 ngut ki khynnah pule na ar tylli ki skul ha nongbah Shillong, Meghalaya.Ka prokram ai jingtip hynnin ka sngi ha Kelian Memorial School, Shillong, ka la sakhi ïa ka jingïashim bynta 51 ngut ki khynnah ha ka prokram ba la saindur ban ai jingtip ïa ki shaphang ka jingkongsan ban pynkhreh lypa ïa ki kam pisa bad ki jingmyntoi jong ka National Pension System (NPS).
Hadien kane, la don kane ka juh ka prokram ha Grace Academy School, Upper Lachumiere, Shillong, ha kaba 60 ngut ki khynnah ki la ïashim bynta.Shaphang ka NPS VatsalyaKa NPS Vatsalya ka plie lad ïa ki kmie ki kpa ba kin kynshew pisa na ka bynta ka lawei jong ki khun jong ki da kaba bei tyngka ha ka account bai bam tymmen bad pynthikna ïa ka jingriewspah lyngba ka bor jong ka sut.
Ka NPS Vatsalya ka don ki lad kynshew ba bun jait, kiba plie lad ïa ki jingbei tyngka ba T. 1000 ha ka shi snem ha ka kyrteng jong ki khun bad kane ka plie lad ïa baroh ki longiing ba kin rung hapoh kane ka skhim.Ïa kane ka sienjam ba thymmai la saindur ban sdang kloi ïa ka jingpynthikna ïa ka lawei kaba phyrnai jong ki khynnah, bad ka dei ka sienjam kaba kongsan ha ka kam bai bam tymmen jong ka India.
Ïa kane ka skhim yn pynïaid hapoh ka Pension Fund Regulatory and Development Authority (PFRDA).Ka jingsdang ïa ka NPS Vatsalya ka pyni ïa ka jingkut jingmut ka Sorkar India ban pynshlur ïa ka jingpynkhreh kaba jrong samoi ha ki kam pisa bad ka jingshngain ïa baroh.