Plie paidbah ka MLA Sutnga-Saipung, ka kong Santa Mary Shylla ïa ka madan futsal ha shnong Saipung

Khliehriat, Jymmang 22: Ka MLA jong ka Sutnga-Saipung Constituency, ka kong Santa Mary Shylla, ha ka 22 tarik Jymmang (Sngi Palei) ka la plie paidbah ïa ka madan Futsal ha shnong Saipung. ïa kane ka madan la bei tyngka da ka District Mineral Funding.
Haba kren kum ka kongsan ka kong Santa Mary Shylla ka la pynpaw ka jingsngew kmen ba ka thaiñ Saipung ruh ka la ïoh ïa kane ka madan futsal ka ban long ka jingmyntoi ïa ki paidbah, khamtam eh ïa ki khynnah samla jong ka thaiñ ha kaba kin ïoh ïa ka lad ban ïalehkai ha kane ka madan.
“Da kane ka madan kan ïarap ïa ki khynnah samla jong ka thaiñ ba kin ïa don bynta ha ka sports, namar haba ym don ka lynti ki lad ki khang, kumta ka donkam ïa Ngi ba ngin pyni ïa ka lad ka lynti ban kyntiew ïa ki ha ka kam sports,” la ong ka kong Santa Mary Shylla.
“Nga khmihlynti ba kin sa nang don shuh ki madan futsal ha kylleng kylleng ki shnong hapoh ka district khamtam ha thaiñ kyndong khnang bad ki khynnah kin ïohlem ïa ka lad ban sei madan ïa ka sap kaba ki don bad ruh ba kin lait ruh na kino kino ki kam sniew namar ka sports ka tei pynbha ïa ka met bad ïa ka jingmut jingpyrkhat” ka la bynrap.
Na ka liang u Deputy Commissioner ka East Jaiñtia Hills District, u Shivansh Awasthi, IAS u la kyntu ïa ki khynnah samla jong ka shnong Saipung ba kin pyndonkam ïa kane ka madan ban pynbyrngia ïalade da kaba ïalehkai namar ka ïarap ym tang ha kaba kyntiew ïa ka koit ka khiah, hynrei ka ïarap ruh ban tei ïa ka jingmut jingpyrkhat ïalade shimet da kaba kdew ruh ba ka sports ka ïarap ruh ban plie ïa ki lad ïohkam ïohjam.
Shuh shuh u la pynpaw ba ka sorkar hapoh ka jingïalam u Myntri Rangbah ka jylla, u Conrad K Sangma, ka la shimkhia bha ban kyntiew ïa ka Sports, te kumta da kaba tei ïa kiba kum kine ki jaka ïalehkai kan ïarap shibun ïa ki khynnah bad ki samla ba kin poi sha ka thong la kadei ha ka state level, national level bad sha kiwei kiwei ki lympung kiba kham shalor.
U la kyntu ïa ki paidbah ka thaiñ Saipung ba ki dei ban pynshlur bad ai mynsiem ïa ki khynnah rit bad ki samla kiba don sap ha ka sports ba kin ïai trei shitom ban poi sha ka thong, namar ka donkam naduh dang rit ban saiñdur ïa u khynnah ban kiew ha ka Sports da kaba bynrap ruh ba ki samla kin lait ruh na ki kam ba sniew kum na u drok.
“Ki don bun ki jait ki skim na ka tnat Sports bad ka Chief Minister Youth Developemnt Scheme ka ban plie lad ïa ki samla don sap na ka bynta ban mihkhmat ha kano kano ka lympung ne ka tournament bad ruh ka don ka khusnam pisa, ki scholarship ban kyrshan ïa kiba ïalehkai sports (athlete)” ong u DC.
U la ong ruh ba kane ka madan futsal ka dei ruh kaba lah ban iarap ïa ka shnong ban kamai pisa ha kaba ka shnong ka lah ban buh da ka dor ïa kito ki briew kiba kwah ban pyndonkam ïa ka madan bad da kata ka pisa yn lah ruh ban pynbit pynbiang ïa ka madan, namar tang hadien shi snem, ar snem ka madan ka la donkam ban maramot.
U BDO jong ka Saipung C&RD Block, u Dr Riwanki Pyrtuh u la ong ba kane ka dei ka madan futsal kaba nyngkong eh ha ka thaiñ Saipung kaba hap hapoh ka Saipung C&RD Block, u la ai khublei ïa u Deputy Commissioner bad ïa ka MLA kiba la wanrah ïa kane ka madan, u la ong ruh ba kaba kum kane ka dei kawei na ki lad ban kyntiew ïa ka thaiñ khamtam ki samla kiba pyndonkam ïa kane ka madan, u la kyntu ïa ki bor shnong ba kin sumar bha ïa kane ka madan.
Ula ong ruh ba na ka liang ka Block kan iarap ban pynioh ïa ka paiñkhana paidbah lyngba ka swachh Bharat, kata ha ki snem ki ban wan, ïa ki lynti ban poi sha kane ka madan u la ong ba un sa pyrshang ban wad ki lad ki lynti bad kyntu ruh ïa ki bor shnong ba kin pyntrei lyngba ki skim shispah sngi kiba wan na Block.
Kiba la ïadon lang ha kane ka sngi ki kynthup ïa u Sirdar jong ka Saipung Elaka, u Zoziama Thianglai, u MDC Saipung, u William Thiete, Waheh Shnong Saipung, u Bah L.N.Nampui, u Secretary shnong Saipung, u D. Durpiu, ki khynnah skul, ki nonghikai bad ki paidbah nongshong shnong, lem bad kiwei kiwei ki riew rangbah, ïa ka prokram la pynïaid da u Anthony Durpui.
Kat haduh mynta ki la don haduh phra tylli ki madan Futsal kiba la plie paidbah ha East Jaiñtia HD kiba la bei tyngka da ka District Mineral Funding ha kaba hynñiew tylli la dep ban plie paidbah katba kawei pat kaba ha shnong ha khappud ka shnong Hingaria ka dei kaba dang pyntrei.