Plie paidbah ka MLA ïa ka project thungdieng, Miyawaki Afforestation ba 16.50 lak tyngka

Khliehriat, Nailur 04 : Sa kawei pat ka project thung dieng, ka Miyawaki Afforestation Project ba la pyntrei da ka tnat Divisional Soil & Water Conservation Officer, East Jaiñtia Hills Division, Khliehriat la leh ha shnong Narwan ha ka dong Kmai Prut kaba la bei tyngka da ka District Mineral Foundation (DMF) la plie mynta ka sngi da ka MLA jong ka Sutnga-Saipung, ka kong Santa Mary Shylla, kane ka project ka dei kaba la bei tyngka da ka District Mineral Foundation (DMF), East Jaiñtia Hills District ka la bei tyngka haduh T16.50 lak tyngka, lah ruh ban bynrap hangne ba kane ka Miyawaki Afforestation Method, ka dei kaba ju leh ki nong Japan, ka Japanese Botanist, Akira Miyawaki.
Haba kren kum ka kongsan, ka kong Santa Mary Shylla ka la ai ka jingkhublei ïa ka tnat Divisional Soil and Water Conservation Officer, East Jaiñtia Hills District bad ïa ki nongpyniaid shnong jong ka shnong Narwan kiba la ia trei shitom lang ha ka ba tei ia ka mariang kaba kup rong jyrngam
Ka la ong ka jingtoh ïa ki marpohkynhdeew ka dei ka kamai kajih jong ki briew bad ka don ruh ka jingshah ktah ka mariang bad halor kane donkam pat ban don ka jingpyn ïa ryngkat lang ne kata ka balancing hapdeng ka roi ka par bad ka mariang, ka kyntu ïa ki nongshong shnong ba kin shim ïa kane ka project kum ka nongkynti jong ki ban pyntikna ba kine ki tynrai dieng ba la dep thung kin im kin san khnang ba kane ka project kan long ka nuksa ïa kiwei kiwei ki shnong ruh, ha kajuh ka por ka pynshlur ruh ïa ki nongshong shnong ban kin ïashymbynta bad ai ka jingiatreilang ha kino kino ki kam kiba ïadei bad ka mariang ban iada ïa ka mariang khnang ba ka lawei kan long kaba don jingkyrmen ïa ka koit ka khiah.
U Deputy Commissioner, East Jaiñtia Hills District, u Shivansh Awasthi, IAS, u la pynshai halor ka jingdonkam kane ka project thung dieng kaba la bei tyngka da ka District Mineral Foundation (DMF) Fund kaba don ka jingthmu ban pynkhie im biang ïa ka khyndew bad ong ruh ba watla ka DMF Fund kan nym lah ban leh lut ïa baroh ki kam pynroi hynrei kane ka project thung dieng ka dei kawei kaba donkam bha bad yn sa leh ha kiwei kiwei ki jaka ruh ïa kaba kum kane ka project thung dieng kaba yn bei tyngka lyngba ka Meghalaya Environment Protection and Restoration Fund (MEPRF).
Na ka liang u Shivansh Awasthi, u kyntu ïa ïa ki heh jong ka tnat ban buh da ki briew kiba na shnong ki ban peit bad sumar ïa ki dieng ba la dep thung khnang ba kin im kin heh kin san bad u don ka jingkhmihlynti ban iohi ïa ki khlaw kiba rben hadien lai bad saw snem
Hadien ka jingialang la pynlong ïa ka jingthung dieng ha kaba la ia shimbynta lang da ka kongsan ka kong Santa Mary Shylla, u Deputy Commissioner, ki heh sorkar bad ki nongshong shnong jong ka shnong Narwan bad kane ka Miyawaki Afforestation Project ha shnong Narwan (Kmai Prut) ka hap hapoh ka Saipung C&RD Block ka don ka jingeh kaba haduh 2 Hectares ka jaka thung dieng.
Kiba la ïa don ryngkat ha kane ka prokram thungdieng ki kynthup u Sub-Divisional Officer, (Sadar), East Jaiñtia Hills District, u Manish Kumar, IAS, u Block Development Officer (BDO), Saipung C&RD Block, Dr R. Pyrtuh, u Divisional Soil & Water Conservation Officer, East Jaiñtia Hills (S&WC), Division, u bah F. Syiemiong, ka Assistant Soil & Water Conservation Officer, ka kong R. Laloo, u Waheh Shnong Narwan, u bah Shri Lamsuk Langstang lem bad ki dkhot shnong.