Plie paidbah ïa u mot ban shna madan bad ka surok Amkoi–Nongbareh Lyntiar

Jowai, Lber 02: U Symbud Myntri Rangbah ka sorkar Jylla u Bah Prestone Tynsong mynta ka sngi 2 tarik u Lber, ula wan sakhi kum u kongsan haka prokram shad Rongkusi bala pynlong da ka Dorbar Shnong Amkoi ha madan shnong kaba hap hapoh ka Amlarem Sub-Division, West Jaiñtia Hills District.
Kiwei de kiba la wan ban donlang ki kynthup ïa u MLA ka thaiñ ma Lahkmen Rymbui uba dei u myntri ka tnad pule puthi, ma Stephanson Mukhim u MLA, ka kong Vevotolu Kezo, SDO (Civil), Amlarem, u ma T.R. Suchen, ma Hopefull Bamon ex-MLA ka Saipung, ki nongïalam shnong lem bad ki paidbah nongshong shnong ka thaiñ.
La pyntip ba ka ‘Shad Rongkusi’ ka dei kawei na ki jinglehñiam tynrai jong ka bri u Hynñiewtrep ban pynneh pynsah ïa ki riti ki dustur jong u longshuwa bad ka pateng ban wan.
La sdang ïa ka prokram da ka jingrwai pdiang burom na ki khynnah skul ka SSA Upper Primary School, ka Lower Primary School bad SSA Lower Primary School bad la ïoh ka jingkren pdiang na u ma Aibor Lamin, Waheh Shnong ka Amkoi,
Na ka liang ka Dorbar Shnong, ki kynhun SHG nalor kiwei de kila pynsngew sha u Symbud Myntri Rangbah halor ka jingdonkam na ka bynta ka roi ka par jong ka thaiñ, kiba kynthup naduh ka jingshna ïa ka surok Amkoi–Shnongpdeng khnang ban pynïajan ïa ka leit ka wan sha Dawki bad sha ki jaka jngohkai pyrthei kiba don sha katei ka liang.
La aiti ïa ka memorandum ban pynbha ïa ka surok Nongbareh Lyntiar–Amkoi lyngba ka tnad (PWD), ka jingpynbha ïa ka madan phutbol jong ka shnong, ka jingshna ïa ki kynroh bad ka Gallery. La dawa ban shna ïa ïing skul thymmai jong ka L.P. School.
U Bah Prestone Tynsong haba ai jingkren ula pynsngew ba kane ka dei ka sien ba nyngkong ïa u ban poi sha Amkoi ka jaka ba itynnad, ula ai ka jingïaroh ïa ka Dorbar Shnong kaba la pynneh pynsah ïa ka riti dustur jong ka thaiñ. Ula kubur ïa ki jingeh kiba mih na ka jingbym biang ki surok bad ka jingdonkam ban pynjan shuh shuh ïa ki shnong.
Haba kaba ïadei baka Memorandum bala aiti ha u ban shna ïa ka surok Amkoi–Shnongpdeng ula pynthikna ba pynkloi ïa kane ka kam da kaba kyntu ïa ki trai jaka bad ïatreilang bad ka sorkar na ka bynta kane ka projek bad ka jingmyntoi jong ki nongshong shnong ka thaiñ hi baroh kawei.
U symbud myntri rangbah un sa bthah ruh ïa ki heh ka tnad PWD ban peit kloi ïa ka jingdonkam jong ka surok Nongbareh Lyntiar–Amkoi. Da kaba ong ba ka thaiñ Ri-War ka long kaba kiew bha ha ka kam jngohkai pyrthei bad kaba don ruh ha ki bynta khappud bad ka Ri Bangladesh.
Ula pynshlur ruh ïa ki kmie ki kpa bad ki samla ban wad ïa ki lad ki lynti ban seng ïa ki kam la jong, kynthup ïa ka kam jngohkai pyrthei, ki kam ïalehkai sports, ki kam tynrai bad ban shim kabu ïaki skhim sorkar kiba ai jingkyrshan subsidy ban pynshlur ïa ki samla bad kumjuh ïa ki skim Scholarship jong ki samla pule.
La pynkut ïa kane ka prokram da ka jingplie paidbah ïa ki mot sah jingkynmaw na ka bynta ban shna ïa ka Madan bol Amkoi bad ka surok Amkoi–Nongbareh Lyntiar (2013–2014) da u kongsan.