Nongstoiñ, K’lyngkot 28: Ka jingangnud jong ki paitbah nongshong shnong ka thaiñ Langpih, ban don ïa ka Sub health centre ha ka shnong Langpih ka la urlong, ha kaba ïa katei ka sub health centre la dep ban shna naduh u snem 2023, tangba haduh mynta ym pat shym la plie satia.
Kumta na ka liang ki nongshong shnong katei ka thaiñ ki la kyntu ïa ka sorkar lyngba ka tnad ka koit ka khiah, ba ka dei ban plie bad pyntreikam noh ïa katei ka jaka sumar.
U bah S.Samakha, haba pyntip ha u nongthoh khubor u la ong ba namar ka jingpynslem jong ka sorkar ban plie ïa katei ka jaka sumar, ha kine ki sngi la sop tang da ki sañium baroh sawdong.
U la ong ruh ba katei ka thaiñ ka dei ka jaka kaba shit bha kumta ki phlang ki kynbat ki heh kloi nalor ba ha katei ka thaiñ, ki don bun eh ki kynja jyrmi kiba sted bha ban pur bad tang ha ka shitaïew ki lah ban taplup da ki spah square phut sawdong.
Shuh shuh, u bah Samakha u la ong ka sorkar ka la dei ban thung noh kham kloi ïa ki nongtrei ha katei ka jaka sumar, khamtam eh ïa u Chowkidar bad ki Nurse, khnang ba ki paitbah nongshong shnong kiba don kam ban leit shim dawai kin kham suk.
Kan long ruh kaba donkam kyrkieh ban pynurlong khamtam eh ïa ki longkmie kiba armet ba kin leit phah sumar, haba ki donkam la ka long arsien ne lai sien ha ka shitaïew, namar ba haduh mynta ki dang hap ban leit phah sumar ha Nonglang PHC lada ki donkam.
Nalor kata u la ong ruh ba lada ki nongtrei ki la don ha katei ka jaka sumar, kan long ka jingmyntoi ruh ïa ki ASHA, ki nongtrei Anganwadi bad kiwei kiwei ki nongtrei, kiba ju ïarap ïa ki paitbah ha ka koit ka khiah khamtam ïa ki khunlung khynnah.
