Nongstoiñ, Naiwieng, 26: Ka Federation of Khasi Jaiñtia and Garo People West Khasi Hills, ka la dawa na ka sorkar Jylla ba ka dei ban plie noh mardor ia ka Blood Band ha Civil Hospital Nongstoin.
Haba kren sha ki lad pathai khubor u bah Willis Syiem Secretary ka seng, u la ong ba ka seng kam lah khlem da pynpaw ïa ka jingsngewnguh ïa ka sorkar MDA kaba la lah ban wan plie ïa ka General Nursing School ha Mawkadiang kaba don hajan ka Nongstoiñ Civil Hospital. Ka jingdon jong katei ka jaka hikai ïa ki Nurses ka la pynsuk shibun ïa ki samla kiba don ka jingangnud ban pyntbit ha katei ka kam.
U la ong ruh ba ha ki snem ba la dep bun bah ki samla kiba kwah ban leit pyntbit ha katei ka kam kiba dei napoh kane ka District, ki hap ban leit sha kiwei pat ki District bad kiwei kiwei bad don ruh kiba hap ban leit shabar ka jylla ruh, hynrei da ka jingdon jong katei ka jaka hikai ka la ong ka jingmyntoi kaba khraw.
Hynrei, u la ong pat ba watla ka Civil Hospital ka la treikam la kham slem, hynrei kumba ka long haduh mynta ym pat don blood bank satia. Kumta na ka liang jong ka seng ka kyntu jur ïa ka sorkar ba kan plie noh bad pyntreikam ïa katei ka blood bank, namar ki don bun bah kiba pang ba shitom kiba don kam kyrkieh ïa ka snam. Lada ka don ha katei ka Hospital, kan ïarap shibun lada jia ba kiba wan ban ai snam kim lah ban poi khamtam lada dei ha ka por mynmiet mynïong.
Utei u nongïalam ka seng u la ong ruh ba la bun bun snem, ka seng ka la shimkhia ban ïakren bad ka sorkar ba kan pynbiang ïa ki lad ai jingsumar hapoh ka District, na ka bynta ka jingmyntoi jong ki paitbah bad kam shym pat la sangeh haduh mynta ban buddien halor kiba bun ki jingdawa ba ka seng ka la dep phah sha ka sorkar.
U la ong ruh ba ki ar tylli ki mat kiba donkam eh na ka bynta ki paitbah kiba ka seng ka la pynsngew sha ka sorkar na ka por sha ka por, ka dei ka Hospital kaba dei na ka bynta ki khunlung bad ki longkmie ba armet kaba don ha Upper New Nongstoiñ kaba ki paitbah baroh ki tip kum ka Civil Hospital barim.
Nalor kata u la pynkynmaw ba la bun bun snem mynshuwa ka seng ka la pynsngew sha ka sorkar halor ka jingdonkam jong katei ka Hospital. Hadien ba la pynheh shuh shuh bad la pynbha ïa ka, la lah ban pyndep bad la kumba katto katne snem ka la sdang ban treikam. Hynrei haduh mynta ym shym pat la plie ïa ka, kumta na ka liang ka seng ka pynkynmaw biang ïa ka sorkar ba kan plie noh ïa katei ka Hospital ki khunlung bad ki longkmie kiba armet, namar kam ïahap satia ïa kiba kin leit phah sumar ha ki Hospital paitbah.
Ha kajuh ka por ka seng ka pynkynmaw ruh ïa ka sorkar ba kan kyntiew kyrdan noh ïa ka Nongkynjang Sub Health Centre sha ka Primary Health Centre kumba la dep mynjur da ka sorkar naduh u snem 2014. Utei u nongïalam ka seng u la ong ruh ba ki don palat sanphew tylli ki shnong kiba hap hapoh ka jingpeit jong katei ka Nongkynjang Sub Health Centre. Kumta ka la donkam haduh katta katta ban kyntiew kyrdan noh sha ka Primary Health Centre, khnang ba ki paitbah kin ïoh ïa ka jingsumar kaba biang.
U la ong ba ka seng ka pynkynmaw ba ki don shibun kiwei pat ki Sub Health Centre kiba la donkam ban kyntiew kyrdan noh sha ki Primary Health Centre, namar ka jingjngai than jong ki ban leit sha kiwei pat ki PHC kiba la don lypa. Nalor kata u la ong ruh ba ka sorkar ka dei ban shimti noh ïa ka Aradonga PHC kaba la aiti ha ka NGO ban pynïaid, namar ki paitbah ba pang ba shitom, kim don satia ka jingshaniah ïa ki Doktor ba katei ka NGO ka buh ha kitei ki Hospital.
