Plie mawnongrim u Myntri sa ar tylli ki skhim umbam

Jowai, Jymmang 27: U myntri jong ka sorkar jylla uba dei peit ïa ka tnat Public Health Engineering (PHE) u bah Renikton Lyngdoh Tongkhar mynta ka sngi ula ïoh ban plie ïa ka skim umbam ka sor Jowai ‘Renovation of Jowai Water Supply Scheme’ kaba dei jong ka tnat PHE Electrical Division Jowai kaba pynpoi umbam lyngba ka wah Umngot.
La plie paidbah ïa kane ka jaka tam umbam kaba la sdang pyntreikam naduh ka snem 2003 bad hadien 19 snem ka jingïaid lynti la lah ban pynurlong bad plie ïa ka mynta ka sngi 27 tarik u Jymmang, 2022 ha ka jingïalang ba la pynlong ha ‘Treatment Plant Complex PHE’ Urkhla Khimusniang, Jowai.
Na ka liang u ma Paul Synnah Executive Engineer (PHE) Electrical Division Jowai ha ka jingkren ula kynmaw burom ïa ki 5 ngut ki riew rangbah kiba don bynta ban sdang prad lynti ïa kane ka skim umbam naduh 2003 kata ïa u ma Sing Mulieh Ex. MLA u ma S.K. Sun (EX MLA, Ex Chief Engineer), ki ar ngut ki Waheh Shnong ka Sohmynting u ma T. Pyrtuh bad ma K. Dkhar, kumjuh ïa u bah John Blah (Junior Engineer SDO PHE) kiba la bam kwai ha dwar U Blei.
Ula ïathuh kila don haduh ar tylli ki Company kiba la pyntrei ïa kane ka skim bad ki bym lah ban pyndep ïa kane ka skim na ki daw bym lah ban kiar, hynrei dei lyngba ka snem 2018 ha kaba u ma Wailadmiki Shylla ula long kum u MLA ula la buddien ïa kane ka skim ban pyndep noh ïa ka da kaba aiti ha u bah Carnel Brightstar Kharsyntiew.
Lyngba ka jingtrei shitom jong u MLA la lah ban Sanction pisa biang sa 59,64,000 na ka sor jylla bad ula wad ki lad ki lynti ha ryngkat ka jingïatreilang jong ka tnat PHE bad ka MeECL.
Na ka shnong Sohmynting haduh Wah Umngot ka jaka ba don ka Pump um ka don ha ka jingjngai kaba 6.5 kilo miter na u surok Sohmynting Modymmai PWD bad la buh (install) ï ki pump kaba 210 kw kaba lah ban Pump ïa ka um haduh 75 liter shi second, katba ha ka ‘Clear Water Pump House’ kaba don ha Urkhla kala don haduh saw tylli ki mashin, ar tylli na ka bynta ka Zone-1 bad ar tylli jong ka Zone-2.
Lyngba kane ka Renovation of Jowai Water Supply Scheme ka lah ban shna ïa ki 13 tylli ki RCC storage Reservoir bad yn pynpoi umbam sha ki dong bapher bapaher kiba don 9 tylli hapoh ka sor Jowai.
Na ka liang haba ai jingkren kum u kongsan bah R.L Tongkhar ula ong la kumno kumno ki don haduh 42 hajar tam tylli ki longïing kiba ym pat dep sanction pisa ban pynpoi umbam hynrei na ki 5,88,000 ki longïing hapoh ka jylla kumba 5,32, 000 tylli la dep sanction ban pynpoi um haduh tyndong ïing jong ki nngshong shnong lyngba ka skim Jal Jeevan Mission (JJM).
Haka juh ka por ula kyntu ïa ki paidbah ban ai ka jingkyrshan ïa kane ka sorkar kaba la trei shibun kata naduh ka jingpynbeit ïa u pud u sam, ka jingtei ïa ka ïing dorbar kaba thymmai wad hapdeng ka jingeh kaba ïa kynduh na ka jingwan lynshop jong ka khlam Covid-19 ha kine ki ar snem.
Katba u ma sngawbhalang Dhar ha ka jingkren ula pynsngew shaphang ki skim bapher bapher ïa kiba ka sorkar kala leh na ka bynta ka Jowai Constituency, naduh ki lynti ki synkieng, ki surok, bad ka jingpynitynnad ïa ka sor Jowai bad kiwei de.
Ula ong ba ki kam jong u MLA ka Jowai ma Wailadmiki Shylla kila pynduh thiah pynduh dem ïa ki myntri sorkar kiba ula wan ban pynkymmaw ïa ki skim kiba ula buddien bad kumjuh ïa kiba dang thymmai.
Ula pyntip ba ka sorkar kala dep Sanction pisa haduh 26 klur na ka bynta ka ‘Smart Road’ hapoh ka sor Jowai kaba don 33 kilomiter tam kaba long katkum ka juk kaba ïa ryngkat bad kiwei pat ki jylla.
Ïa ka surok Jowai By-Pass tnadlaskeiñ haduh Soomer ka sorkar kmie kala dep sanction haduh 15 klur ban pynshan ïa ka bad ïa ka pung Thadlaskeiñ la dep mang pisa 36 klur shen yn sa buh mawnongrim noh ïa ka bad kumjuh ïa ka Mini Secretary ha Jowai, ong u ma Dhar. Ula pyntip ruh ba ïa ka ophis jong u Deputy Commissioner ka West Jaiñtia Hills lah ban pynkylla noh sha ka Mall lada donkam namar ka jingkhapniah ka sor Jowai.