Shillong, Jymmang 22: U Myntri Rangbah ka Jylla Conrad K Sangma, ha ka sngi Palei, ula khap ribon ïa ka German Language Training Programme ha Shillong Tech Park-na ka bynta ki Nurse ka Jylla ki ban leit trei sha ri Germany.
Kane ka prokram ka dei kaba la kyrshan da ka Meghalaya State Skill Development Society (MSSD) hapoh ka Tnad Labour, Employment & Skill Development, ka dei kaba la pynlong ban ai jinghikai ïa ki Nurse kiba la shah jied na Jylla ba kin leit trei sha ki jaka sumar bapher bapher ha Ri Germany.
La ong ba hadien ka jingjop ban pynpoi ïa ki Nurse ka Jylla ban trei ha Japan bad Singapore, ka Germany mynta ka la kylla long ka jaka kaba bud kaba ai ïa ka rynsan na ka bynta ki Nurse bad ki Nongtrei ka Koit ka Khiah ka Jylla.
“Kaba ngi leh mynta ka sngi ka long ban pynkylla ïa ka jingtynjuh sha ka kabu kaba khraw. Ka Meghalaya ka don ïa ki Nongshong shnong ba dang ïakhynnah tam hapoh ka Ri bad ngi la pynlong ïa kane ka kabu kum ka bor ha ka pyrthei. Lada ngi phah wat 30,000 ngut ki riew shemphang shabar ri, ka jingphah pira jong ki kan kot sha ka T.250 klur shibnai-kata T.3000 klur ha ka shisnem sha ki kti jong ki bahaïing hasem,” ïathuh u Myntri Rangbah.
Ha kaba ïadei bad kane u Conrad ula kular ïa ka jingkyrshan ba pura na ka Jylla, kynthup ïa ka jingïarap pisa na ka bynta ki jinghikai bad ban tei ïa ki jingshaniah ha ka ban ïoh trei shabar ri bad ong, “Ki Kmie Kpa mynshuwa ki don ka jingartatien namar ka jingsngewkhia halor ka jinglut jingsep bad ka jingshngaiñ. Mynta, ka Sorkar ka ïeng kum ka guarantor. Ngi don hangne ban pynthikna ba ki khun ki kti jong ki kin shngain, kin ïoh ïa ka jingtbin lynti bad ai ïa ka kabu kaba biang palat.”
Halor kane u Myntri Rangbah ula pyntip ruh ba un sa leit synran hi dalade ïa ka kynhun first batch na ki kyrtong kiba shah jied ban leit sha Germany.
U la ïathuh ruh ba kane ka jingïatreilang kan nang pynkhlaiñ ïa ka jingïadei hapdeng ka India bad ka Germany bad u sngew sarong ba ka Meghalaya lyngba ki nongtrei samla ka lah ban long shi bynta jong kata ka khana jong ka jingroi.
U la ong, “Ka Germany ka la ïakynduh ïa ka jingduna ha ka jingdon ki nongtrei ha ka koit ka khiah. Hapoh u 2035, ngin donkam sa 7 mllion ki nongtrei kiba tbit. Ka prokram mynta ka sngi ka pyni ïa ka jingïaid lynti kaba pynkylla ïa ka jingim, kine ki samla kin ym trei tang ha Germany hynrei kin roi, kin noh synñiang, bad kin kiew.” ong ka Andrea Jeske, Deputy Consul General kaba mihkhmat ïa ka German Consulate Kolkata haba pynpaw ïa ka jingkyrmen kaba khraw halor kane ka jingïatreilang.”
Ka la kren ruh halor ki polisi thymmai jong ka Germany shaphang ka jingwan buhai shnong kum ka Opportunity Card bad ka Skill Immigration Card, kiba ai ïa ki lad ki lynti kiba kham suk na ka bynta ki nongtrei ki bym dei na ka European Union.
U Jan Eben, Country Director General of People to Help Germany, ula pynpaw ïa ka jingtreikam ba pura jong ka prokram bad ong ba kane ka jingïatreilang kam dei tang shaphang ka jingïoh kam hynrei ka dei shaphang ka jingtei ïa ki jingim jong ki.
