Mawkyrwat, Naitung 30: Ka South West Khasi Hills District Badminton Association (SWKHDBA) ka la ïoh ban plie pyrda ïa ka lympung ïalehkai badminton kaba la tip kum ka ‘6th South West Khasi Hills District Inter-School Badminton Championship 2025’ ba la pynlong hapoh ka Mawlangwir Indoor Stadium, South West Khasi Hills District.
Lah ban kdew ba ha kane ka ‘6th South West Khasi Hills District Inter-School Badminton Championship 2025’ ki skul kiba wan ïashimbynta ki don baroh 11 tylli skul bad 143 ngut ki nongïashimbynta kata 100 ngut na ka liang ki khynnah shynrang bad 43 ngut ki khynnah kynthei.
Ha ka jingphiah ïa ki snem jong ki nongïashimbynta ki don, ha ka kyrdan ba 12 snem shapoh ki don 20 ngut, ha ka kyrdan ba 14 snem shapoh ki don 38 ngut, ha ka kyrdan ba 16 snem shapoh ki don 42 ngut bad ka kyrdan ba 12 snem shapoh ki don 43 ngut ki nongïashimbynta.
Haba ai jingkren ha ka jingïalang, u bah G.G. Bung Snaitang, Deputy Chairman jong ka Meghalaya States Planning Board u la long kum u kongsan u la ai mynsiem na ka bynta ki khynnah skul ba lada ki kwah ban kiew ha kino kino ki kyrdan khamtam eh ha ka liang jong ki jingïalehkai da lei lei kim dei ban klet pat ïa ki kyrdan jong ki jingpule namar kumba ka sorkar Meghalaya hapoh ka jingïalam jong ka MDA-II lyngba ka tnad jong ka sports department mynta ka la pynmih ïa kawei ka polisi treikam kaba ki khot ka “Meghalaya Outstanding Sportspersons Direct Appointment Policy 2025” ka ban ai kam ïa u ne ka khynnah kiba wanrah nam wanrah burom ïa ka jylla Meghalaya lyngba ka jingpoi jong ki sah ka thong jong ka jingïajop ha ki jingïalehkai kata la ka long lyngba ka jingkhur jong ki ha ka takma ksiar, takma rupa lane takma rnong.
Shuh shuh ha ka jingkren jong u u la pynkynmaw ruh ïa ka jingsdang bad jingpynlong ïa ka jingïalehkai badminton ha kaba ïa kane ka jingïalehkai la sdang nyngkong ha u snem 1862 ei ei da ki ophisar shipai jong ka ri Bilat kiba don ha Pune, India, ha ki snem 1860, ki la ïakynduh ïa kawei ka jingïalehkai (local game) kaba ki khot ka “Poona” bad ha ka snem 1873 ki la sdang ban shna ïa ki kyndon jong kane ka jingïalehkai.
Ha kane ka sngi plie la donlang ruh u bah H.S. Diengdoh, President ka South West Khasi Hills District Badminton Association, ki nongkitkam jong ka South West Khasi Hills District Badminton Association (SWKHDBA), ki nongïashimbynta na ki skul bapher bapher, lem bad ki nonghikai.
