Shillong, Naiwieng 19: Kum shi bynta ka jingrakhe Audit Week 2024, la plie paidbah ïa ka rynsan e-Pension ba thymmai jong ka Ophis u Accountant General (A&E), Meghalaya mynta ka sngi da u John K Sellate, Pr Accountant General (Audit) bad Director General, Regional Capacity Building and Knowledge Institute, Shillong. Ha ka jingai jingkren ha kane ka sngi, u Sellate u la ban jur halor ka jingkongsan jong kane ka sienjam ban wanrah ïa ka jingshai bad ka jingseisoh ha ka kam sam bai bam tymmen. “Ka jingplie ïa ka rynsan bai bam tymmen ka long kum u mawmer ha ki jingpyrshang jong ngi ban ai ka jingshakri kaba kham bha ïa kito kiba ïoh bai bam tymmen. Ngi ïeng skhem na ka bynta ka jingpynsuk ïa ka kam bai bam tymmen bad ban pyllait katba lah ïa kane na ki jnit jnat,” u la ong.
Ka rynsan bai bam tymmen ka la treikam mynta bad lah ban pyndonkam ïa ka lyngba ka [https://epension.megonline.nic.in].
Ha kane ka juh ka sngi, u Bah C H Kharshïing, Pr Accountant General (A&E), Meghalaya u la plie paidbah ïa ka jingai jingshakri lyngba ki SMS kaba thmu ban pynsted ïa ka jingpynkhreh ïa ki kot ki sla na ka bynta ka bai bam tymmen jong ki nongtrei jong ka jylla ki ban shongthait.
Kane ka jingai jingshakri lyngba ki SMS kan ai jingtip man u bnai ïa ki nongtrei jong ka jylla kiba shongthait bad ki Controlling office jong ki shaphang ka jingpynbiang ïa ki kot ki sla kiba ïadei bad ka bai bam tymmen. Kane ka sienjam ka dei kaba la saiñdur ban pynduna ïa ki jingpynslem lyngba ka jingïakren kaba kham bha hapdeng ka ophis AG bad kito kiba shong thait na ka kam.
Ha ka jingai jingkren, u Bah Kharshïing u la kdew ïa ka jingkongsan jong kane ka jingai jingshakri ban pynbha shuh shuh ïa ka kam ban pynshisha ïa ki bai bam tymmen. “Ka jingwanrah ïa ka jingai jingshakri lyngba ki SMS ka dei ka sienjam kaba heh na ka bynta ka kam bai bam tymmen kaba kham seisoh bad kaba kham suk ban pyndonkam. Ngi ïeng skhem ban ai ka jingshakri kaba biang tam ïa kito kiba la shongthait na ka kam bad kane ka sienjam kan ïarap ïa ngi ban pynurlong ïa kane ka thong,” u la ong.
Kane ka rynsan ka dei ka sienjam kaba heh ban kyntiew ïa ka jingseisoh bad ka jingïoh bynta ha ki jingai jingshakri kiba ïadei bad ka bai bam tymmen na ka bynta ki nongtrei jong ka jylla bad la saiñdur ïa ka ban pynsuk ïa ka kam ïa kiba la shongthait na ka kam, ki ophis Treasury bad Drawing bad Disbursing, kaba plie lad ïa ki ba kin ïoh ïa ki jingtip shaphang ka bai bam tymmen, ban buddien ïa ki jingbuh application, bad ka jingïoh jingtip ha ka por kaba biang.
Kane ka sienjam ka dei shi bynta ka jingïeng skhem ka Indian Audit bad ka tnad Accounts ban pyndonkam ïa ka teknoloji ban pynbha shuh shuh ïa ka jingai jingshakri ïa ki paidbah.
