Plie ka NEC bad IIM Calcutta Innovation Park ïa ka NEEDP na ka bynta ki Startup ha ka North East

By Mawphor Editor On Sep 3, 2022

Shillong, Nailur, 02:Ka North Eastern Council, ha ka jingïatreilang bad ka B-School Incubator IIM Calcutta Innovation Park, ka la sdang ïa ka North East Entrepreneurship Development Programme (NEEDP) kaba nyngkong duh mynta ka sngi hangne ha NEC Secretariat, Nongrim Hillsha Shillong.
Ïa kane la ithuh kum ka sienjam kaba nyngkong kaba kdup lang ïa kito kiba dei ban ïoh jingmyntoi na baroh 8 tylli ki jylla ka thain bad kane ka sienjam ka thmu ban lap bad pynkupbor ïa 270 ngut ki nongseng kam lajong na ka thain shatei lammihngi lyngba ki prokram kiba btin kti ïa ki ha ki por ba dang sdang ïa ka kam bad hadien ba la sdang ïa ka kam.
Ïa ka program NEEDP la pyllait paidbah da u Secretary ka NEC, u K. Moses Chalai, IAS. La ïadon lang ruh ki ophisar na ka North Eastern Council bad ki nongmihkhmat na ka IIM Calcutta Innovation Park, uPranjal Konwar, COO, IIMCIP, uRajarshi Sarma, Program Head, NEEDP & Flo Oberhofer. U Program Head, Prime Hub Meghalaya ruh u la ïadon lang ha kane ka sngi. Ka R. Lalrodingi, Advisor, BIT ka la ai jingbatai bniah shaphang kane ka program.
Ha ka jingkren jong u, u K. Moses Chalai u la ong ba ka long kaba donkam bha ban wanrah ïa ka jingsaindur thymmai bad ka teknoloji ha ki startup bad ki kam khaii barit baria khnang ban kyntiew ïa ki. U la ong ruh ba u sngewthuh bha ba yn sa don ki startup kiba long kiba jop bad ruh ki unicorn na ka thain shateilammihngi. “Kane ka thain ka don shibun ki samla kiba don sap bad ka jingstad jong ki, ka ai mynsiembeit. Ka jingplie lad plie lynti bad ka jingai ïa ki rynsan kan wanrah ïa ka lawei kaba shai ïa ki bad kan kyntiew ruh ïa ka ïoh ka kot jong ka thain shatei lammihngi,” u la bynrap.
La pliepaidbah ruh ïa ka bynta kaba nyngkong jong kane ka sienjam, ka NE Entrepreneurship Challenge (Hunt) ha kane ka sngi. Kane ka dei ka jingkyllumlang ïa ki sienjam bapher bapher kiba thmu ban shem ïa 270 tylli ki jingthmu startup kiba biang tam na ka thain. Kane kan kut ha ka Reward and Recognition Summit, ha kaba ki 270 tylli ki startup kiba shah jied kin ïoh ïa ka song pisa, ki certificate bad ka jingpynrung hapoh ki prokram Incubation bad Pre-Incubation.
Ka prokram Pre-Incubation ka thmu ban ïalam lynti ïa 150 tylli ki jingpyrkhat / jingsaindur ïa ki startup khnang ba kin don ka rukom treikam kaba don lut ki bynta kiba donkam ban long ka kam kaba jop bad kaba ïohnong. Man na kine kin ïoh ruh ïa ka prototype grant kaba T. 1 lak, bad ki 25 tylli kiba lah ban treikam kham bha kin ïoh shuh shuh sa T. 4 lakshuwa ban kut ka prokram pre-incubation.
Ïa ka prokram Incubation yn pynïaid lang ha kajuh ka rukom ïa ki 120 tylli ki startup kiba don ka Proof of Concept lane ka jingkamai. Kane ka prokram ka thmu ban pynskhem ïa ka jingsngew-thuh ki startup ïa ki kam kiba ïadei bad ka kam khaii bad ban ïarap ïa ki ban kyntiew bad pynïaid iew ïa ki kam. Kine ki startup kin ïoh man T. 3 lak kum ka commercialization grant, bad ki 20 tylli kiba trei kham bha kin ïoh shuh shuh sa T. 7 lak haba kut ka prokram.
Ka jingshongshit ha ki kam startup ba seng dalade ka la sdang kiew ha kane ka thain ha kine ki 5 snem ba la dep. Ka thain ka la ïohi ïa ki lad kiba bun ha ki kam lajong kiba lah ban pynbeit ïa ki jingeh kiba bun kiba kynthup ruh ka jingbym ïoh kam bad ka jingduna ka jingïohi ka ri baroh kawei ïa ka kolshor bad ki jingdon jingem jong ka thain. Katba ki la don ki sienjam ban kyntiew ïa ka jingseng kam lajong ha ki jylla da ki sorkar jylla, kane ka dei ka sien kaba nyngkong ba la sdang ïa ka prokram kaba heh haduh katne na ka bynta ki nongseng kam lajong ha baroh kawei ka thain shatei lammihngi.