Khliehriat, Risaw 07 : Ka MLA jong ka Sutnga-Saipung Constituency, ka Kong Santa Mary Shylla hynnin ka sngi ka la plie paidbah ïa u maw nongrim ban pynheh shuh shuh ïa ka madan ïalehkai football ha New Hills ha shnong Ratacherra East Jaiñtia Hills District.
Katei ka jingpynheh ïa katei ka madan ka dei kaba ha ka mang tyngka kaba T300000 (lai lak tyngka) kaba na ka skim SRWP-2023-2024 kaba lyngba ka Lumshnong C&RD Block.
Haba kren ha ka jingïalang ha New Hills ha Ratacherra, ka kong Santa Mary Shylla ka la pynpaw ka jingsngew kmen halor kane ka jingïoh lad ban pynheh ïa ka madan ïalehkai ha shnong bad ong ba ka jingïalehkai sport ka dei ka bynta kaba donkam bha ha ka ban saiñdur ïa ka long briew man briew jong ki khun samla, ka la ong ruh ba ka jingïalehkai sport ka wanrah ruh ïa ka jinglong ryntih, ïa ka jingïatylli, bad ruh ka kyntiew ïa ka koit ka khiah, ka pynpaw ka jingkmen ba ki nongshong shnong ki mih shakhmat bad pynpaw ka mynsiem jingsngew kmen jong ki ha kaba kyntiew ïa ka kam ïalehkai sport da kaba mynta ki la ïoh ka lad ban pynheh ïa ka madan kaba ki ju ïalhekai.
Ha kaba ïadei pat bad ka jingialhekai Football Knockout Tuornament ba la sdang ha katei hi ka sngi ha ka madan ha ka dong New Hills (Ratacherra) ka kong Santa.M.Shylla ka la ai ka jingkitbok kitrwiang ïa baroh ki kynhun ialehkai kiba ïa shim bynta ha kane ka tournament bad ong ba ai ba kane ka madan ialehkai kan long ka rynsan ban pyni ïa ki sap ki phong jong ki rang ialehkai ha ka kam ialehkai kumjuh ruh ha ka jingialong paralok bad kan long ruh ka rynsan ka ban ai mynsiem ïa kiwei ruh ki samla na ka por sha ka por.
U MDC barim jong ka Narpuh, u bah D.Pohshna uba la ïa don lang ha katei ka sngi, u la ai ka jingkhublei ïa ka MLA kaba la wan ban plie paidah ïa u maw nongrim ha katei ka jaka ha Ratacherra bad pynpaw ruh ïa ka jingsngew nguh bad sngew burom namar ka jinglong la kloi jong ka ban ïa don lang abd ki paidbah ha kano kano ka por.
U bah Pohshna u ai ka jingkhublei ruh ïa ki ba pynlong ïa ka katei ka Football Knockout Tournament ha kaba ki samla jong ka thaiñ ki la wan ban ïa shimbynta ha kane ka tournament bad kitbok kitrwiang ba ki rang ïalehkai ki nang lah ban kiew shaphrang ha ka kam ïalehkai football.
Kiba la ïa don ryngkat ha katei ka sngi ki kynthup ruh u Waheh Shnong Ratacherra, u bah Pynkhlaiñ Dhar lem bad ki dkhot shnonb kumjuh ruh ki nongshong shnong.
