Plie ka Kong Marian Maring ïa ka jingïakynduh lang ki Samla Katholik Karbi ha Shnong Marmaiñ
Nongpoh, Nohprah 17: Kumba ki samla Karbi na ka Balang Katholik ki ju pynlong ïa ka jingïakynduh lang ba shisien shisnem man la u snem ha ka thaiñ Marmaiñ ha Ri Bhoi bad na ka laing ka Samla Katholik na ka jaid bynriew Karbi ha ka lama ka Karbi Catholic Youth Committee, Meghalaya hynnin ka sngi ki la sdang ïa ka lympung ïakynduh lang jong u snem 2022 ha ka Shnong Marmain ha Ri Bhoi District.
Ïa kane ka Annual meet ka KCYCM la wan ban plie paidbah da ka Kong Marian Maring kum ka Kongsan bad kaba la ai ruh ka jingkyrshan na ka bynta ban pynlong ïa kane ka lympung ki khun samla Karbi na ka Balang Katholik ha Marmain kum shi bynta ban ai mynsiem ïa kine ki khun samla.
Nalor ki nongïalam ka Karbi Catholic Youth Committee, Meghalaya la don ryngkat lang ruh u Paralad Toor, ki riew rangbah bad kynthup ki paidbah na ka thaiñ Marmain kiba la wan ban ai mynsiem ïa kine ki khun samla ka Balang Katholik na ka jaid bynriew Karbi.
Ha ka jingkyrshan ka Kong Marian Maring bad u Paralad Toor, ha kane ka sngi la sam ruh ai ki khusnam sha kito ki samla ïalehkai sport kiba la wan nam burom bad kumjuh ruh la pynlong da ki proram bapher bapher kum shi bynta ban pynphuh pynphieng ïa kane ka jingïakynduh lang ki samla Katholik na ka jaid bynriew Karbi ha ka thain Marmain.
Haba ïa jingkren ha kane ka sngi, ka Kong Marian Maring kum ka Longkmie kaba ju don bynta ban kyrshan ïa ki khun samla ka la pynpaw ka jingkmen ban ïa don bynta ha kane ka jingplie ïa kane ka lympung ïakynduh lang ki khun samla Karbi na ka Balang Katholik bad ka kyrmen skhem ruh ba kane ka jingïakynduh lang kan ai mynsiem ïa kiba bun ki khun samla ba kin long kita ki samla kiba don ka jingkitkhlieh ym tang hapoh ka Balang bad kin don ruh ka jingkitkhlieh ha ka imlang ka sahlang bad na ka bynta ka ri bad ka jaid bynriew. ï
Lyngba jong kane ka sngi, na ka liang ka îing ka sem jong ka Kong Marian Maring bad u Paralad Toor ki la sam sngewbha ruh da ki jaiñ Blanket sha ki longïing baduk kum ka daw ka jingai sngewbha Christmas bad snem thymmai sha kito ki longïing baduk ba hap ha ka thaiñ Marmain.