Shillong : Ka kompany e-commerce ban pynmih hi na India ka Flipkart ka la plie paidbah ia ka jaka buh ia ki marbam mardih ha Assam, Guwahati.
Kane ka jaka yn sa lah ban thaw haduh 300 tylli ki kam la ki long kiba hap ban trei beit hangne ne kiba don ka jingiadei bad kane bad yn sa lah ruh ban ai ka jingshakri ban pyniasoh bad ka iew ka hat ia palat hajar ngut ki nongdie jingdei, ki MSME, bad ki nongrep na Assam bad ka thain shatei lam mih ngi bad wanrah ruh ka jingtyrwa sha ki nongthied ia ki mar kiba don 7000 jait bad kin ioh ban jied na palat 200 tylli ki thup.
Kane kadei ka jaka treikam jong ka Flipkart kaba ar, hadien ka Coimbatore, ha kaba jan baroh ka kam la trei da ki kynthei. Ka jingheh jong kane ka jaka ka don kumba 1.23 lakh square feet bad hangne yn buh ia ki marbam mardih kiba ju thied bha da ki briew kiba shong basah ha palat 800 tylli ki PIN code ha kylleng ki bynta jong ka Guwahati bad ki jaka ba marjan.
Ka Flipkart Grocery ia mynta ka la lah ban ai jingshakri haduh palat 1,800 tylli ki nongbah bad palat 10,000 tam ki PIN code ha kumba 28 tylli ki jylla ha India. Ka la nang pynkhlain shuh shuh ia ka jingtreikam jong ka ha kine ki ar snem ba la dep da kaba buh haduh 28 tylli ki fulfillment centers kiba don ha ka jaka kaba heh kumba 27 lak square feet ban pyndap ia ka jingkiew ka jingdawa ha ka ri baroh kawei. Ka Flipkart ka la shna ia ka App ha ki 11 jait tylli ki ktien ba kren ha India.
U Senior Vice-President and Chief Corporate Affairs Officer ka Flipkart Rajneesh Kumar U ong, “Kum ka kompany kaba la pynmih hi na ri India, ka Flipkart ka la shim ia ka bynta kaba kongsan da kaba pyntikna ban ailad ia ki nongthied ban iohmad ia kaei kabab ha tam ha ka rukom thied jong ki da kaba pynsuk bad pynaram ia ki ban ioh ia ki jingdonkam ba man la ka sngi.”
