Plie ka Dr. Ampareen ïa ka jingïalap paidbah ha Krishi Vigyan Kendra, Upper Shillong

Shillong, Jymmang, 30: Ka Myntri jong ka Sorkar Jylla kaba khmih ïa ka tnat ka Rep ka Riang ka Dr. M. Ampareen Lyngdoh ha ka sngi Palei ka la plie ïa ka jingïalap paidbah ha baroh kawei ka ri ha Krishi Vigyan Kendra, 5th Mile, Upper Shillong.
Ka jingthmu ba kongsan ba la pynlong ïa ka jingpynsngewthuh bad pyntip ïa ki buit thymmai ha ka rep ka riang ha kane ka aiom lyiur na ka bynta ki nongrep jong ka ri, ka ‘Viksit Krishi Sankalp Abhiyan’ (VKSA) ka la sdang ha baroh kawei ka ri naduh ka 29 tarik, Jymmang, 2025 ka ban bteng haduh ka 12 tarik, Jylliew 2025.
Ïa ka ‘pre kharif campaign’ kaba kham bniah la sdang hapoh ka jingïalam lynti u Myntri Rangbahduh ka ri u Narendra Modi bad u Myntri uba khmih ïa ka tnad ka Rep ka Riang ka Sorkar India u Shivraj Singh Chouhan.
Ha Meghalaya, ïa kane ka jingïalap paidbah, la plie pyrda ha Krishi Vigyan Kendra, East Khasi Hills ha kaba la sakhi lang da ki ophisar na ka tnad Agriculture, Horticulture, AH & Vety, ka ICAR ATARI-7, ki stad saiantis na ka ICAR, CAU bad kiwei kiwei ki tnad ha ryngkat ki nongrep jong ka Distrik.
Haba kren ha kane ka sngi, ka Dr. Ampareen ka la pynshlur ïa ki nongrep ban ïashim bynta naduh ka mynsiem ha kane ka jingïakynduh bad ban shim ïa kane ka kabu ban kyntiew ïa ka jingtip bad jingtbit jong ki ha ka kam rep da kaba ïashim bynta ha ki jingïamir jingmut ba sani bad ïasam jingmut lem bad ki stad ka rep ka riang ki ban sa leit sha ki shnong kiba bun ha baroh ki 11 tylli ki Block jong ka distrik.
Ka la ai jingmut ba ki nongrep jong ka distrik bad ka jylla baroh kawei hi ba kin pynïasoh ïa ki lum rep ki jong ki ban pynpaw ïa ki jaka kiba kham heh khnang ban ïoh jingmyntoi na ki skhim pynroi bapher bapher jong ka Sorkar.
Ka Myntri ka la banjur ïa ka jingdonkam jong ki polisi treikam kiba ïa kyllum lang da kaba ïa pynïahap ïa ki jinglong jingman ka thain jong ka jylla, khamtam haba khmih janai ïa ka jinglong ba kham kyrpang ki jaka rep ka ne ka thain bad jylla hi baroh kawei.
La kyntu ruh ïa ki nongrep ban pynduna ïa ka jingpyndonkam ïa ki sboh dawai bad ban wad ïa ki lad ki lynti thymmai kiba khuid ryngkat ka jingïamir jingmut bad ki stad Saïan, ban rep ha ka rukom kaba khuid ryngkat ka mariang da kaba pyndonkam ïa ka sboh pyut bad kiwei de ki buit thymmai.