Tura, ïaïong: Ka MP ka Tura, ka Agatha K Sangma hynnin ka sngi ka la plie paidbah ïa ka Training Hall jong ka Fisheries Depart ment ha Digri Chiring Fish Seed Farm ka ba ha Duragre ka ba hap hapoh Rongram C&RD Block, hajan Tura, bad ka la sam ruh da ki laitylli ki kali lai shaka sha ki katto katne ki nongri dohkha jong ka West Garo Hills ka ba dei lyngba ka skhim Pradhan Mantri Matsya Sampada Yojna, 2020-2021.
Ha kane ka prokram la ïa don lang ruh u Deputy Commissioner, Ram Singh, ki heh na ka tnat Fisheries Department na baroh ki district ka Garo Hills nalor kiwei pat.
Ha ba kren ha ka jingïalang, ka Agatha ka la ong ba ka jingplie ïa kane ka jaka aijinghikai ne ka training hall ki ba bun ki nongri dohkha jong ka thaiñ kin ïoh shibun ki jingmyntoi, bad ka kyntu ruh ïa ki nongri dohkha jong ka thaiñ ba kin kyntiew da lade ïa lade bad ban pynjur ha ka ba ïadei bad ka kam ri dohkha.
Ka la ong ruh ba ka skhim PMMSY katkum ka jingsngewthuh ka jong ka, ka dei ka sienjam ka ba kongsan bha ba la shim da ka sorkar India bad sorkar jylla hapoh ka jingïalam jong u myntri rangbah u ba la trei shitom na ka bynta ban pyn urlong ïa kine ki jingthmu jong kane ka skhim.
Da ka ba iai ban halor ka jingdonkam ban pynduna ha ka ba ïadei bad ka jingwanrah dohkha na kiwei pat ki jylla, kane ka MP ka la kyntu ïa ki nong ïoh jingmyntoi ki ba la ïoh pdiang ïa kine ki kali ha ryngkat ki synduk thah ba kin trei shitom bad ban sngewthuh halor ki jingan gnud jong ki paidbah ka jylla ha ka ba iadei bad ka jingpynmih dohkha na la ka jong ka jylla.
Kumjuh na ka liang u Deputy Commissioner ka West Garo Hills , u Ram Singh ha ka jingkren u la ong ba ka la don ka jing bym ïahap tara ha ka ba ïadei bad ka jingpyndon kam ïa ka dohkha bad ka jingpynmih ha ka jylla.U la ong ba ka jingbam dohkha ha ka jylla ka long ka ba jur bha bad ha kajuh ka por ka jingwanrah ïa ki dohkha na shabar ka jylla kum na Andhra Pradesh bad Orissa ruh ka long ka ba jur bha namar ka jingduna palat jong ki nong pynmih dohkha na ka jylla.Kumta u kyntu jur ïa ki nongri dohkha ba kin ïaleh ban ïada ïa ka mei mariang khamtam ha ka ba ïadei bad ki tyllong um bad ki wah khnang ban lah ban ïada ïa ki jingthaw ki ba im hapoh um.
Shuh shuh ha kane ka sngi la pynlong ruh ïa ka jingpynshai paidbah ha ka ba ïadei bad ka kam ri dohkha bad kiwei pat ki jait jingthaw ki ba im ha um lyngba ki executive assis tant na ka tnat National Fisheries Development Board (NFDB).
