Shillong, Jymmang 25 : Hadien 18 bnai ba ka jaka die kali jongka Tata Motors ka la khang khyrdep ha kane ka nongbah Shillong mynta ka sngi Balang kane ka kompani ka la plie biang ïa ka jaka die kali jongka ha Mawblei ha ka jingïatrei lang bad ka Frank Motors.
U Commisisoner jongka tnad Transport u I Ingty u la long u kongsan ban plie ïa kane ka jaka die kali bad pyllait paidbah ruh ïa ka kali jongka Tata Company ka TATA Harrier ha ka jingïadon lang ki heh ka kompani bad kiwei kiwei.
Ha ka jingkren lyngkot u Ingty u la ong ka long kaei kaei kaba sngewtynnad ban ïadon lang ban pylait paidbah ïa kane ka kali jong ka Tata Company mynta ka sngi. U kitbok ba ka Frank Motors kan lah ban ai ka jingshakri ba bha sha ki paidbah namar ki la ïatrei lang bad ka Tata kaba dei ka kompani kaba heh ka jingpynmih kali ha India. U Regional Sales Manager ka TATA PV u Soumen Paul u la ong ba kane ka kali ba thymmai ka long kaba la shna paka bha ban shakri ïa ki paidbah. “ Kawei kaba ka TATA ka ïoh bat ïa ka nam haduh mynta ka long ba ki kali jongka ki long kiba biang bad paka bad kiba lah ban shakri hok ïa ki paidbah. Ngi dei ruh ka kompani ba nyngkong eh ban shna kali ha India bad ba ïoh nyngkong ruh ïa ka nam 5 Stars.
Ha kane ka jylla Meghalaya ruh kiba bun ki briew ki pyndonkam da ki kali TATA bad u kyrmen ba ka jingieit jong ki briew ïa ka kompnai kan dang ïai bteng wat la baroh shi katta ka la don ka jingthut na ka daw ka jinghap khang ïa ka jaka die kali ba ha Mawlai.
U la ïathuh ba kiba bun ki kali ki dei ki kali ban pyndonkam ha ka kit ka bah ïa ki briew bad ïa ki mar ki mata bad da ka jinglah ban pynmih ïa kine ki kali ba thymmai nga kyrmen ba ka jingsngew jan jong ki paidbah ruh kan dang jur.U la ïathuh ruh ba ki kali electrict jong ka TATA ki tbit bha bad kumba 90 % ka die ka thied kali ha kane ka ri ka long na kine ki jait kali bad kine ki kali electrict kin don ruh ha Franks Motors.
