Plie bah Kyrmen ïa u mot sah kynmaw ïa ki nongseng jong ka club ha Bataw naduh u snem 1967

Khliehriat Lber 27 : Ka Rum Shnong Youth Club Bataw ka dei ka club kaba la rim bha ba la seng nongrim naduh ka 3 tarik u kyllalyngkot 1967 bad myn ha ka 25 tarik mynta u bnai u myntri ka sorkar jylla, kum u kongsan, u bah Kyrmen Shylla u la plie don burom ïa u mot sah kynmaw ba la tei na ka bynta ki nongseng bad ha kajuh ka por la pynkup burom ruh ïa ki nongseng jong kane club.
La pynlong ruh iaka jing sngap jar kaba shi minit kum ka dak ka jing kynmaw burom ïa ki nongseng kiba long ki longshwa kiba la leit noh na kane ka sla pyrthei.
Haba kren ha ka jingialang, u bah Kyrmen Shylla, u la ai ka jingiaroh ïa ki nongialam jong katei ka club kiba la lah ban pynlong ïa kane ka prokram kaba kyrpang kaba long kum ka jingkynmaw ieid ïa ki nongialam ba kyrpang kiba la saiñdur ïa ka Rum Shnong Youth Club Bataw kiba la long shisha kum ki nong prat lynti bad ong ruh ba kum u nong mih khmat jong ka thaiñ un pyrshang katba lah la ka bor namar ba ka por ka kyndiat eh na ka daw ka jingwan ka khlam covid-19 ym lah ban pynbiang lut ïa baroh ki jingdonkam hapoh ka constituency, u la kyntu ïa ki paidbah ba kin ai ka jingiatreilang bad kular ba un pyrshang ban iarap ïa kane ka club.
U Symbud Kongsan, ha kane ka prokram, u ba dei ruh u Chairman jong ka Jaintia Hills Autonomous District Council, u Dr Sanky Shangpung, u la ong ba ka long kaba donkam ban don ji nongialam kiba thrang shisha ban shakri ïa ka kam naduh mynsiem bad ki paidbah ruh ki long kiba donbok bha ba ki ioh ki nongialam kiba kum ki nongialam jong ka Rum Shnong Youth Club ha kaba ki kam ki kren kham jam ban ïa ka ktien.
Ha kane ka prokram la ïa don ryngkat lang ruh ki riew rangbah kiba paw khmat kiba kynthup u MDC Tuber uba dei ruh u Deputy CEM jong ka JHADC u bah Lasky Rymbai, u MDC Khlirhriat, u bah Finelyness Bareh, u Waheh Shnong Bataw, u bah Shemi Rupsi bad kiwei kiwei.
U Kongsan, u la pynkup burom ïa ki nongseng kiba la seng ïa ka Rum Shnong Youth Club (1967) kiba dang don haduh mynta kiba kynthup u ma Odingson Biam, u Founder Secretary, u ma Roland Suchen, u dkhot jong ka Executive Committee, u ma Bindro Suchen, u ma Kyrshan Sumer, u ma Kmen Rymbai.
La pynkup burom ruh ïa ki nongkitkam ba rim, kiba kynthup u ma Willing Sumer, u ma Rimiyoo Lamare, u ma Onickson Sumer, u ma Hemi Rupsi kiba bat kum ki General Secretary kiba rim, kumjuh ruh u ma Bilan Suchen, u ma Pyrkhatbha Rupsi kiba bat ïa ka kam kum ki Chairman ba rim, u ma Taltis Sumer kum u President ba rim bad u ma Edward Lamare u Convener ba rim.
La ioh ïa ka jing kren pdaing na u Waheh Shnong bataw, ka jingkren ai khublei na u General Secretary Rum Shnong Youth Club, u ma Ampli Rupsi bad ia ka jingialang la pyniaid da u President ka club, u bah Deihok Sumer, la pynbyrngia ruh ïa ka prokram da ki jingshad tynrai na ki khynnah skul jong ka Bataw Upper Primary School.