New Delhi, Nohprah 22: U Myntri Kam Pohïing bad Cooperation jong ka Sorkar Pdeng, Amit Shah, mynta ka sngi u la plie paidbah bad buh maw nongrim na ka bynta ki projek kam pynroi bapher bapher ba shongdor palat T. 668 klur ha Dhalai, Tripura. U Amit Shah u la ïakren bad ki briew na ka jaitbynriew BruReang ha Haduklau Para Bru Settlement Colony (BRUHA PARA) ha Dhalai bad leitjngoh ruh ïa ki ïingsah jong ki bad ïakynduh ïa ki.
Ha kane ka sngi, u Myntri Rangbah jong ka jylla Tripura, Prof. (Dr.) Manik Saha, u Union Home Secretary, Director, Intelligence Bureau bad Director General, Bureau of Police Research and Development (BPR&D) ruh ki la ïadonlang.
Ha ka jingai jingkren jong u, u Myntri Kam Pohïing jong ka sorkar pdeng u la ong ba hapoh ka jingïalam jong u Myntri Rangbah duh, Narendra Modi, ka sorkar pdeng ka la ïarap ban pynbiang jaka sah ïa 38,000 ngut ki briew na ka jaitbynriew BruReang. U la ong ba la jan 25 snem, ki BruReang, kiba im ka jingim kaba jynjar, kim ïoh ïa ki jingdonkam ba hakhmat eh kum ka um, ki paiñkhana, ka bording, ka pule puthi, ka ïoh kam ïoh jam, bad ki lad jingsumar.
U la ong ba kito kiba synshar hangne la slem bha kim ïohi ïa ka jingjynjar jong ki BruReang, hynrei u Modi u ïohi, u sngewthuh, bad pynbeit ïa ki jingeh jong ki. U Shah u la ong haba ka jingkylla ka wan ha Tripura bad ka party jong ki ka ïoh thaw sorkar, ha katei ka por ka don ruh ka sorkar jong u Narendra Modiji ha ka sorkar pdeng.
U la ong namar ka soskular ba la ïasoi ha katei ka por, la pynkynriah 40,000 ngut ki briew, bad la pynbiang na ka bynta ka ïoh kam ïoh jam, ki lad ïoh jingsumar, ka pule puthi, ka umdih kaba khuid, ki paiñkhana bad ki cooperative na ka bynta ki longkmie. U la bynrap ba ha ka samoi treikam jong ka sorkar kaba rim, la don bun ki skhim, hynrei kim shym la pyntreikam.
U Amit Shah u la ong ba ym tangba u Myntri Rangbah duh Modi u la pynkhreh ki kam na ka bynta ki BruReang, kiba shong ba sah hapdeng ka jingim kaba jynjar naduh u snem 1998, hynrei la pynkynriah ruh ha 11 tylli ki shnong ha ka jinglut kaba T. 900 klur. U la ong ba kine ki shnong mynta ki ïoh ka bording elektrik, ki surok, ka umdih, ka lad jingpynïasoh, ki solar street light, ki dukan reshon, ki skul Anganwadi, bad ki jaka ai jingsumar.
U Myntri Rangbah duh Modi u la pynthikna ba ki briew kiba sah ha kine ki 11 tylli ki jaka ki ïoh baroh ki hok, kumba long kiwei kiwei ki nongshong shnong jong ka ri. U Shah u la bynrap ba ïa kine ki briew la kynthup ha ka thup jong ki nongthep vote, bad ka sorkar Modi ka la ai ki card reshon, ki health card bad ki cooperative ïa ki ban pynthikna ka jingïoh kam jong ki. U la bynrap shuh shuh ba kine ki briew mynta ki long trai ïa ka jaka kaba 1200 square phut, bad lyngba ka jingïarap jong ka sorkar India, la shna ïa ki ïing jong ki.
Shuh shuh, ka sorkar Modi ka ai ruh ka jingïarap kaba man ka bnai kaba long T. 5,000 na ka bynta 24 bnai.
U Myntri Kam Pohïing bad Cooperation jong ka sorkar pdeng u la ong ba ha ka samoi treikam jong ka sorkar kaba rim, tang 2.5% ki briew ki ïoh umdih, katba mynta 85% ki longïing ki la ïoh ïa ki kor um. Mynshuwa, ym don u briew baduk ba ïoh ei ïa ki mar bam, hynrei mynta, hapoh ka jingïalam jong u Modi, 82% ki briew ha Tripura ki ïoh ei 5 kilo u khaw. U Shah u la ong ba ka sorkar Modi ka ïarap baroh ki jinglut ha ka jingsumar na ka bynta 80% ki briew ha Tripura, haduh T. 5 lak.
U la bynrap ruh ba ki jingbei tyngka ki la wan ha Tripura, la shna ïa ki surok, bad la pynpoi bording elektrik bad ki paiñkhana ha man ki longïing. Ka jingdon kiba ieh shiteng por ïa ka jingpule ha Tripura ka la hiar sha ka 3%, bad ka jingpynrung kyrteng ha ki skul ka la kiew na ka 67% sha ka 99.5. U Shah u la ong ba ka sorkar Modi bad ka sorkar Tripura ki la pyni haba kito kiba ngeit ha ka synshar paidbah ki wan ha ka bor, ka ïalam sha ka roi ka par jong ka ri bad ka jylla. U la ban jur ba ka sorkar jong u Narendra Modi ha ka sorkar pdeng, bad ki sorkar jong u Biplab Deb bad mynta u Prof. (Dr.) Manik Saha ha Tripura, ki rah shakhmat ïa ka kam jong ka roi ka par.
Ka jingshna ïa ka temple jong ka Maa Tripura Sundari ka dang ïaid shaphrang, ka ban pynsuk ïa ki riewngeit na kylleng ka pyrthei ban ïoh ïa ka jingkyrkhu jong ka Blei.
U Amit Shah u la ong ba mynta ka Tripura ka long ka jylla kaba shongsuk shongsaiñ bad ka jingïaumsnam ka la kut. U la ong, ka sorkar Modi ka la pynneh ïa ka shongsuk shongsaiñ ha ka jylla da kaba ïasoi lai tylli ki soskular bad ki kynhun kieng atiar jong ka Tripura bad kawei bad ka jaitbynriew BruReang. U la ong shuh shuh ba mynta, ka Tripura ka jam shaphrang ha ka lynti jong ka roi ka par ba ïalam da u Modi ryngkat ka shongsuk shongsaiñ.
U Myntri Kam Pohïing bad Cooperation jong ka sorkar pdeng mynta ka sngi u la buh maw nongrim na ka bynta ki projek kam pynroi bapher bapher ba kynthup ïa ka Central Detective Training Institute (CDTI) ha Agartala. Ka jingthmu jong kane ka sienjam kaba kongsan da ka Tnad Kam Pohïing ka long ban pynkhlaiñ ïa ka jingshngaiñ ha ka thaiñ shatei lammihngi bad ki ri ba marjan, bad ban wanrah ïa ki rukom treikam ba bha tam ha ki kam pulit. Kum ban shu kdew ba ha ka jingïalang plenary ba 69 jong ka North Eastern Council (NEC) ba la long ha nongbah Shillong, ka la don ka jingai jingmut ban plie ïa ka academic research center ha ka jingïatreilang bad ki jaka pule ban wad bniah ïa ki jingeh ba ïadei bad ka jingshngaiñ jong ka thaiñ shatei lammihngi.
Ka sorkar Tripura ka la mang 9.57 acre ka jaka ha Jirania sub-division jong ka West Tripura district, na ka bynta kane ka kam. Ka Tnad kam Pohïing ka la mynjur T. 120 klur ban shna ïa ki jingdon jingem. La pyndep ïa ka jingjurip ïa ka jaka ba la mang. Ka CDTI ha Agartala kan ai jinghikai pyntbit ïa palat 6,000 ngut ki shipai man ka snem na ki jylla ka thaiñ shatei lammihngi bad ki Central Armed Police Force (CAPF). Ka institute kan dei kaba la biang baroh ki jingdonkam katkum ka juk mynta kum ki advanced classroom, ki simulation lab, ki IT data center, bad ki jaka na ka bynta ka practical training ka ban ai ki sap treikam katkum ka juk mynta ïa ki pulit.
Kane ka institute kan ai jinghikai pyntbit bad ki lad wadbniah shaphang ki jinglong jingman jong ka jingshngaiñ hapoh bad shabar ka ri, ha ka thaiñ shatei lammihngi. Ka institute kan don ruh ki jaka wad bniah, ka ban ïatreilang bad ki jaka ai jinghikai ban peit ïa ki jingeh ha ka jingshngaiñ kum ki lad ban ïaleh pyrshah ïa ki kam pyntriem, ka jingpeit ïa ki jaka khappud, ki jingdie ïa ki briew, ka jingshalan ïa ki drok, ka jingrung beaiñ jong ki briew sha ka ri bad ka jingshalan beaiñ ïa ki tiar ïaleh.
Ka jingseng ïa ka CDTI ha Agartala ym tangba kan kyntiew ïa ka jingtbit treikam ki kynhun pulit hynrei kan kyntiew ruh ïa ka jingïatreilang bad kiwei ki ri ban weng ïa ki jingeh ba ïadei bad ka jingshngaiñ ha ki jaka khappud.
