Nongstoiñ, Jylliew 4: Ka jinglong jingman jong ka Congress ha ki lai tylli ki Constituency ha West Khasi Hills, kata ka Mawshynrut, ka Rambrai Jyrngam bad ka Nongstoiñ ym long shuh ban ïakren, namar ka jingmih noh jong ki nongïalam ba khmat ka la ktah haduh katta katta ïa ka party.
Ha Mawshynrut Constituency ka jingmih noh jong u Bah Sraly Rashir MDC barim jong ka Congress, ka la ktah haduh katta ïa ka Constituency baroh kawei, kat haduh ba lada twad jingmut na kylleng ki shnong bad ki jaka hapoh ka Constituency, ka kyrteng jong ka Congress ka la pjah slam slam lait noh hange hangtai. Kat kum ki jingtip ba la ïoh lum na baroh sawdong ka Mawshynrut Constituency haduh kine ki sngi, ka sur bad ka jingsawa na ki paitbah nongthep vote ka long tang ïa ki ar tylli ki party kata ka HSPDP bad ka NPP.
Katkum ki jingtip ba bniah ba la ïoh ban lum na ki nongkyrshan jong kitei ki ar tylli ki party, la ong ba lada phai ha ka jingnang jingstad bad ka jingshemphang u kyrtong jong ka HSPDP, u la bit la biang bha hynrei u kyrtong jong ka NPP pat wat la u la biang pura ha ka jingdon ïa ka spah ka phew, hynrei ha ka jingnag jingtip te u dang duna bha ong ki riew rangbah na kylleng ki jaka.
Haba pyrshang ban kylli pat la ka Congress kan pynïeng kyrtong ne em ha u 2023 na Mawshynrut, don kiba ong ba tang ban lait na ka jingshah khylliap lama bad ka jingshah pynduh ïa ka party, lada pan tiket da uba kumno kumno ruh yn ai beit bad ki la ong ruh ba ki nongkyrshan ruh lada shu antad haduh ban da pou ka election 2023 kin dang don palat san hajar ngut.
Haba phai pat sha ka Rambrai Jyrngam la ïoh jingtip ba u bah Golden Nonglong na Nongstoiñ u ba dei ruh u saiantis u lah ban ïakhun na ka Congress, namar ba u bah Kimfa S Marbañiang MLA ba mynta u ba la shah suspend na ka Congress un ïaleh noh na ka NPP.
Haba phai pat sha Nongstoiñ, ka Congress ka dang don ïa u bah Gabriel Wahlang u ba long mynta u MDC, hynrei na ka jingmih pyrthei jong u bah Macmilan Kharbani kum u kyrtong na ka Trina Mool Congress, ka la pynduh jingkyrmen namar kiba bun ki nongïalam jong ki Prmary Unit ki la leit pynïasoh noh sha ka TMC ban ai ka jingkyrshan ba pura ïa u bah Macmillan Kharbani.
