Shillong, Naiwieng 03: Ka jingbym lah ban ai rai ka sorkar ha kaba ïadei bad ka Meghalaya Cherra Cement Limited (MCCL) kala buh ïa ki nongtrei kiba dang don haduh mynta ha ka jinglynga bad pisa mynsiem namar kim tip shano kin poi.
Na ka liang jong ki nongtrei ki la juh ïakynduh na ka por sha ka por ïa ki bor jong ka sorkar bad kaei kaba ki kwah ka long tang ba ka sorkar kan siew ïa ka tulop jong ki kumba ki dei ban ïoh.
Na ka liang jong ki nongtrei haduh mynta kim pat don kano kano ka jingkren ha kaba ïa dei bad ka jingpynïaid ïa katei ka karkhana namar, ki don lai tylli ki bor, ka sorkar, ka hima Sohra bad ka hima Mawmluh bad kine haduh mynta kim pat ïa kynduh ban ïa kren.
Kumba ka paw na ka liang jong ka sorkar kala kwah ban pynlait noh ïa katei ka karkhana dewbilat kaba na ka jingpeit jong ka sorkar, ne ba kan don ka jingïatreilang hapdeng ka sorkar bad ki riew shimet, hynrei haduh mynta kam pat shai aiu ka sorkar kan leh ïa kane ka karkhana dewbilat.
