Sohra, Nailur 15 : Ka jaka ri khunswet ha Mawsmai ba tip kum ka Borsing Syiem Children’s Home ha ka sngi Thohdieng ka la ïoh pdiang ïa ka kali na ka MDC jong ka Nongshken, Kong Grace Mary Kharpuri kaba katei ka nongmihkhmat ka pynïoh lyngba ka skim jong u Myntri Rangbah ba la tip kum ka Chief Minister Rural Development Fund (CMRDF).
Ha kane kajuh ka sngi, na ka liang ka District Sohra – Mawsmai ki la pynkup burom kyrpang ruh ïa u heprit Jedaia Rajee uba dei uba nyngkong na katei ka jaka ri khunswet kaba sdang naduh u 2015 ban pyndep ïa ka eksam Matrik.
Nalor ka jingkren jong ka Kongsan, la ïoh ruh ïa ka jingïathuh lyngkot shaphang ka jingeh ba katei ka jaka ri ka kynduh lyngba u Pastor R Bareh ba dei u Chairman nalor kiwei kiwei.
“Kadei ka jingïalam lynti jong u Blei namar nga ruh nga khlem poi pyrkhat hynrei ha ka jingïakynduh ïa u Pastor Bareh i la pynsngew ïa ka jingdonkam jong kane ka Children’s Home. Kumta, nga ruh khlem kano kano ka jingmut hynrei nga la shu ong ïa i ba ngan sa pyrshang,” ong ka Kong Grace.
Nalorkata, ka ong ruh ba ka jingwan pyllait paidbah jong ka ïa katei ka kali kam don bynta bad ka Politik ïoh ki paidbah ki pyrkhat da kumwei pat. Ka ong ruh ba kum ka riewngeit ka ngeit beit ba kiei kiba jia ki dei beit da ka jingbtin lynti jong u Blei na ka bynta kaba bha.
“Nga dei ka MDC jong ka Nongshken bad kumta ngam lah ban wanrah ïa ka skim MDC jongnga nangtai shane. Kumta nga phaikhmat sha u Myntri Rangbah ka Jylla Conrad K Sangma ban phah ïarap na ka bynta kane ka Children’s Home bad nga ïathuh ha u ïa ka jingeh ba ki khynnah ki mad ïa ka jingeh ha u slap u phria ba ki leit sha skul bad ruh ha ka pang ka shitom. U Myntri Rangbah khlem kyrngah u la shu ong beit ba ka biang bad kumta u la ïarap bad pynïoh ïa kane ka kali. Kane baroh ka urlong da ka jingïarap jong u,” ka la bynrap biang.
Na ka liang u Pastor Bareh pat u la ïathuh ba ha katei ka jaka sah ki la don haduh 12 ngut ki kynthei bad 14 ngut ki shynrang bad utei u heprit Jedaia uba ki pynkup burom ha katei ka sngi namar u la dap 18 snem u la hap ban mih noh na katei ka jaka sah kaba long katkum ki kyndon jong ka Home.
Ha kane ka sngi la ïoh ruh ïa ka jingkren na u Rev. JM Passah, Rev. P Kharwanlang nalor kiwei kiwei.
Ha kajuh ka por, ki bor pynïaid jong ka Home ki phah ruh ka jingkhublei sha u Myntri Rangbah ka jylla uba la ai sngewbha ïa katei ka kali kaba long ka jingkyrkhu kaba khraw ïa baroh kiba sah ha katei ka iing.
Nalor ka jingdonlang bun ki Pastor, ki Tymmen Basan la pynshongkun ïa katei ka prokram ba lyngkot da ka jingdonlang ki longkmie longkpa bad ruh da ka jingrwai na ki heprit.
Na ka liang ka Kong Grace ka la sam ruh ki nep kup syaid sha baroh kitei ki heprit kynthup ïa ki nongpeit jong ki nalor ka song kyrpang sha utei u heprit ba nyngkong ban pyndep ia ka Matrik nangtei.
