Nongpoh, Nailur 05 : Kumba ju rakhe man la u snem ïaka sngi burom ki nonghikai ïa kaba la ju rakhe haka 5 tarik Nailur kaba dei ruh ka sngikha jong u khraw pyrkhat ka Ri ba dei ruh u President barim ka Ri India u Dr. Sarvepalli Radhakrishnan, ka ophis jong ka District School Education Officer bad Sub-Divisional School Education Officer mynta ka sngi hapdeng ka jingiphuh iphieng kila rakhe ïaka sngi burom ki nonghikai (Teachers’ Day) kaba 61 ha District Library ha Nongpoh ban ai ka jingïaroh ïaki nonghikai halor u synñiang u bynhei ban kyntiew ïaki samla pule bad ka jingnang jingstad khamtam ban pynwandur ïaki samla pule.
Ïa katei ka jingïalang la wan ban shim bynta da u Bah Mayral Born Syiem MLA ka Nongpoh kum u kongsan haka jingdonlang u Bah Sosthenes Sohtun MLA ka Jirang bad u Bah George B Lyngdoh kum ki symbud kongsan haka jingdonlang ka kong VA Hynniewta ADC, kong Paidolyne L Nonglait DSEO bad kiwei kiwei ki riew rangbah bad ki ophisar ryngkat ki khynnah skul bad nonghikai.
Ha katei ka jingrakhe la sam ruh ïaki khusnam sha ki nonghikai haka district kiba la shah jied halor u synñiang ba kila noh sha ka pule ka puthi bad khamtam ban kyntiew ïaka jingnang jingstad ba kynthup ïaka Kong Glenise Iawphñiaw napdeng ki nonghikai Lower Primary School kaba dei ruh ka Head Teacher jong ka St. Peter’s RCLP School Nongsder, ka kong N Violinda Shabong kaba la shah jied haka kyrdan Upper Primary School kaba dei ka nonghikai jong ka RBP Higher Secondary School, katba haka Secondary Level la ioh da ka Bahunshisha Lyngskor kaba dei ka Assistant Teacher jong ka Nehru Memorial Secondary School Umsning. La sam ruh ïaka khusnam Best Scout Master bala ioh da u KJ Peter Assistant Teacher jong ka Don Bosco Higher Secondary School, Byrnihat bad Best Guide Captain bala ioh da ka Rasna Kharwanlang Assistant Teacher jong ka Don Bosco Higher Secondary School, Byrnihat.
Nalor kitei ki nonghikai naka liang ka ophis u DSEO bad SDSEO kala sam ruh ïaki khusnam sha ki samla pule kiba la warah ka nam bad burom ïaka district ba kynthup ïaka samla Lañiewkyrpang Nongrum kaba la ioh haka kyrdan ba 8 jong ka top 20 haka eksamin SSLC, Sohan Thapa u ba la ioh ïaka kyrdan ba 15 haka SSLC naka skul New Era Scondary School, Silbester Shadap u ba la ioh haka kyrdan ba 9 jong ka top 10 haka eksamin HSSLC.
