Jowai, Nailar 16: Ïa ka sngi ïoh jinglaitluid ka Ri India kaba ‘76th Independence Day’ la rakhe hynnin ka sngi 15 tarik u Nailar ha kylleng ki bynta jong ka West Jaiñtia Hills District bad la sakhi ba kane ka jingrakhe kala long kaba iphuh ipheing da ka jingwan ïashim bynta lang jong ki hajar ngut ki paidbah nongshong shnong.
Ha sor Jowai la leh burom ïa kane ka sngi ha madan Jrisaleiñ, Chutwakhu, Jowai ha kaba la wan ban pynher ïa ka lama lai rong ka Ri bad ka jingshim ïa ka Rashtriya salute da u ma Dasakhiatlang Lamare uba dei myntri ka sorkar jylla ba dei peit ïa ka tnad Transport uba la pynsngew ïa shibun ki kam pynroi jong ka sorkar MDA.
Ha kane ka sngi la don ka jingïaid March Past bala ïashim bynta haduh 32 tylli ki Contingents, katba ïa ka nam jop la ïoh rah da ka Q.C Spring side Higher Secondary School, ba ar ka Police Public Secondary School bad balai ka Little Flowers Secondary School. La pyniphuh iphieng ïa kane ka sngi da ka jingrwai ieit Ri, ki jingshad tynrai bad kiwei kiwei de ba la shim bynta da ki khynnah skul bad ki samla pule jong ki skul, ki College bad ki dong bapher bapher. Ïa ki khusnam sha ki baroh ki nongïashim bynta ha ryngkat ki Certificate la sam da u Deputy Commissioner u bah Garod LSN Dykes.
Ïa kane ka juh ka jingrakhe la leh ha Amlarem (Civil) Sub-Division ïa ka prokram la pynlong ha Amlarem Subdivision Sports Association Mini Stadium, Ladjaplem, ha kaba u myntri sorkar jylla ba dei peit ïa ka pule puthi bad ka kam poh ïing u bah Lakhmen Rymbui ula long u kongsan bad pynher ïa ka lama lai rong kila don haduh 6 tylli ki contingents kiba kynthup ïa ka tnad pulit bad san tylli ki skul.
Ha ka jingïaid Match Past la wan ba nyngkong da ka Syiem Jingsuk Higher Secondary School, ba ar ka Mang Hai Ryum Secondary School bad ba lai ka Riwar Jaintia Church of God Secondary School. La sam ruh ïa ki khusnam sha ki nongïashim bynta bad kumjuh sha ki khynnah pule kiba la wan shakhmat ha ka SSLC bad HSSLC Examination, 2022.
Katba MLA ma Coming One Ymbom ula pynher ïa ka lama ka ri ha Hima Shangpung ha ka jingrakhe ba la pynlong ha Hula Playground Moosyiem, Shangpung. Shi bynta na ka jingdap pura 75 snem ka ri ne ka ‘Azadi Ka Amrit Mohatsav’ baroh ki nongshong shnong ka District kila shim bynta lang ha ka jingpynher ïa ka lama ka ri ha manla ki thliew ïing kaba ong (Har Ghar Tiranga campaign) naduh ka 13th haduh ka 15th Nailar, 2022.
