Tura, Jylliew 29 : Sa ka seng saiñ pyrthei Janata Dal (United) (JDU) ka la ïoh ban phrung khlieh ha ri lum Garo da ka jingleit pynïasoh jong uwei u Principal ba la shong thait na ka Chidekggre Higher Secondary School, Williamnagar u Robinus T Sangma lem bad ki Nokma hakhmat jong u National General Secretary jongka JDU u Afaque A Khan ha ka Sngi Thohdieng ba la dep ha nongbah Guwahati.
U Khan u dei uwei na ki nongïasaid aiñ uba la rim bad tbit bha ha Supreme Court. La ïadon lang kiwei kiwei ki nongïalam na kiwei kiwei ki jylla ha katei ka jingpynïasoh u Robinus.
U Robinus u la ong “ Nga la pynïasoh sha ka JDU hakhmat jong u Khan uba dei u Convenor ka JDU jong kane ka thaiñ shatei lam mihngi na ka bynta ban rah ïa ki mat hakhmat ka sorkar. Nga sngewkmen ïa ka jingshaniah kaba phi ki nongïalam phi la ai ïa nga bad mynta ba nga la dep pyniasoh ngan iak hun ruh ia ka election MLA 2023 na ka Williamnagar Constituency”. Kiba la ïadon lang ki long President jong ka Arunachal Pradesh, Nagaland bad Manipur.
U la ong shuh shuh “ Ngan pdiang sngewbha naduh ka dohnud ïa kino kino kiba kloi ban wan pynïasoh sha ka JDU ha Meghalaya namar kane ka party ka dei kaba burom ïa baroh ki jaidbynriew bad jait niam bad kaba trei na ka bynta ka bha ka miat ka imlang ka sahlang”.
Ka JDU ka dei kaba synshar mynta ha Bihar bad ka don ruh 16 ngut ki MP ha Lok Sabha bad 5 ngut ha Rajya Sabha. Kane kam dei ka jylla ba nyngkong ba ka JDU ka ïoh ban phrung khlieh ha kane ka thaiñ namar ka don 7 ngut ki MLA ha Arunachal Pradesh, 6 ngut ki MLA ha Manipur bad uwei na Nagaland. “ Nga ngeit skhem ba kan kiew bad ïoh ka jingkyrshan ba pura na ki paidbah ka jylla Meghalaya ruh. Ngin dang jied ïa ki nongkitkam ha jylla Meghalaya bad halor kane shen yn sa pynbna ha ki lad pathai khubor” ong u Sangma.
