Nongstoiñ, Nailur 16 : Tang namar ba u kontraktor u ba ïoh ban pynbha bad siang rong ïa ka surok na Mawdiang sha Mawkyllon kaba jrong tang kumba ar kilomitar shiteng, um lah ban pyndep la phra snem kynthih, ki paitbah ka thaiñ Langdongdai kata naduh Mawkyllon, Langdongdai, Mawsmai, Mawguru, Langsaw bad kiwei kiwei ki shnong kiba don ha katei ka thaiñ, ki la takraiñ tyngeh ïa ka sorkar namar ki jingjynjar ba bun rukom tang namar ka jingbym biang ka leit ka wan ka kit ka bah.
U bah Birbor Riangtem u la ong ba baroh ki shnong kiba don ha katei ka thaiñ naduh Mawkyllon haduh Malangkona, ki dei kiba hap ha ka hima Nonglang Sirdarship bad kum u nongpeit nongkhmih ïa ka synshar khaddar, ka khia ka shon, ka bha ka miat bad ka suk ka saiñ jong ki khun ki raïot hapoh ka hima, um lah satia ban shu sngap bad ban shu peit kai ïa ki khun ki raïot jong ka hima haba ki mad ïa ki jingeh ha kiba bun ki liang la ka long ha ka leit ka wan, ka kit ka bah bad khamtam ïa kiba pang ba shitom kiba ha ka por lyiur la hap ban kit da ki briew naduh Langdongdai haduh Mawdiang ba kin leit phah sumar ha Riangdo CHC.
U la ong ruh ba ïa ki longkmie kiba pun khun tang ban leit phah check up ha Riangdo ruh, la hap ban leit on da ki rangbah kumba ar ngut lai ngut kaba la ktah haduh katta katta ïa ka trei ka ktah bad ka bylla ka sngi.
Utei u rangbah u la ong ruh ba halor ka jingbym pyndep jong u kontraktor ïa katei ka surok la bun sien bun wat, ki rangbah katei ka thaiñ ki la leit ban ïakynduh ïa ki ophisar sorkar kiba dei peit ïa ki surok, hynrei haduh mynta ym shym la sei soh ei ei.
