Shillong, Naitung, 22: Phra ngut ki mynder Bangladeshi kiba la shah bat ha New Bongaigaon Railway Station ha ka sngi Baar ki la phla ba kumno ki la ïoh rung tuh sha India lyngba ka jylla Meghalaya bad katba ki dang rung beaiñ, kim shym la ïohi satia ïa kino kino ki shipai ïada khappud kiba ap pahara ïa ka khappud ha ka por mynmiet.
Ha u kyrwoh, la pyntip ba ki 8 ngut ki mynder Bangladeshi ki la wan rung tuh sha India hynnin ka miet Lah Sngi U Blei da kaba shimkabu ïa ka jingbym don ki shipai kiba ap pahara ïa ka khappud hadien ba ka jingker sainar shiah ka la khyllem na ka jingjur jong u slap, kaba la ïarap ïa ki ban ïoh rung beaiñ da kaba suk sha u pud u sam jong ka ri India.
“Ngi la wan na Bangladesh. Ka jingker sainar ka la khyllem na ka daw ka jingjur jong u slap bad ngi la kiew nalor ka jingker ba la khyllem bad rung sha India. Ym don shipai hato haba ngi la rung sha u pud u sam jong ka ri India,” ong u wei na ki mynder Bangladeshi uba la shah bat ha New Bongaigaon Railway Station.
“Ngi la wan na Bangladesh bad ngi dang thmu ban leit sha Chennai ban leit trei bylla,” ong sa uwei u mynder bad bynrap ba ka kynhun jong ki ka kynthup ïa ki phra ngut ki mynder Bangladeshi kiba la jam na ka shnong Jamalpur sha Meghalaya.
Kaba kham sngewkyndit shuh shuh ka long ba uwei na ki nongrung tuh na ka ri Bangladesh u la ong ba ki lah ban don shuh shuh ki briew la jam sha u pud u sam jong ka ri India.
