Mawkyrwat, ‘Nailur, 09: Ka ophis jong u District Mental Health Programme (DM&HP), South West Khasi Hills District, kaba hap hapoh ka jingpynïaid jong u District Medical & Health Officer (DM&HO), South West Khasi Hills District ha ryngkat ka jingïatreilang bad ka Adolescence Friendly Health Clinic, ka la rakhe ïa ka “World Suicide Prevention Day 2025” ne “Ka Sngi ïada na ka jingïap da kaba dkhat jubor ïa la ka jingim” hapoh ka phang “Changing the Narratives on Suicide” ha Mawkyrwat, South West Khasi Hills District.
Kum shibynta jong kane ka jingrakhe, ka ophis DM&HP ka la pynlong ïa ka rally kaba la sdang na ophis jong u Block Development Officer, Mawkyrwat C&RD Block, kaba la iaid lyngba Civil Hospital, Mawkyrwat, ter ter sha Iew Mawkyrwat bad pynkut biang ha ophis BDO, Mawkyrwat.
Ha kane ka rally, ki 6 tylli ki skul bad ruh ki Self Help Groups (SHG) hapoh Mawkyrwat C&RD Block ki la shimbynta bad pyni ïa ka jingïatreilang ha kane ka kam kaba kongsan ban ïada na ka jingdkhat jubor ïa la ka jong ka jingim.
U Bah C. Kassar, MCS, Assistant Commissioner ka South West Khasi Hills District, haba long kum u Kongsan ha ka jingïalang, u la ong ba ka jingïap da kaba dkhat jubor ïa la ka jingim ka dei ka jingïakhun kaba rieh ha ka jingim briew, kaba ktah ïa kiba bun haduh ba ka poi sha ka bynta kaba sngewsih eh.
U la ong ruh, “Ka jingim ka dei kaba kordor. Namarkata ngi don bynta ban ai jinghikai bad pynsngewthuh ïa ki paidbah ba ka suicide kam dei satia ka lad jingshim rai. Ka jingdonkam eh ka long ba ngi iwei pa iwei ngin ïoh pynsngap ïa ka sur jong kiwei pat, khamtam haba ki wan ban pynpaw ïa ki jingeh kiba ki kynduh.”
Shuh shuh, u bah C. Kassar u la kyntu ïa ki paidbah ba haba ki sngap ïa ki jingiathuh jong kiwei pat halor ki jingeh ba ki shem, ki dei ban long tang ki nongsngap kiba kloi ban ai jingïarap, hynrei ym ban long ki nongbishar— hynrei “ban sngap khlem jingbishar”.
Namarkata, u la pynkynmaw ba ka jingïada na ka jingbthah jubor ïa la ka jingim kam dei eh tang ka jingisnei, hynrei ka donkam ruh ïa ka jingai jingtip, ka jingai jinghikai bad ka rukom ai jingkyrshan ha kaba kane ka jingai jingkyrshan ka dei ban sdang naduh na ki longïing longsem la ka dei ha ka Balang, ka imlang ka sahlang lane ha ki jaka pule. “Ka jingïap ne jingduh kawei ka mynsiem kam dei ka jingjia ba sngewsih ne person tragedy hynrei ka dei ka jingduh ïa ka imlang ka sahlang, ka shnong ka thaw bad ïa ka ri ka jaidbynriew”, ong u bah C. Kassar.
La pynshongkun shuh shuh ïa ka sngi da ka jingïadonlang u Dr. F.R. Lartang, DM&HO, South West Khasi Hills District lem bad ki nongtrei jong ka ophis DM&HP, ki nonghikai bad ki khynnah skul. Ka jingïalang baroh kawei ka la long kum ka lad ban pynsngewthuh paidbah ïa ka jingdonkam ban ïakhun bad ban ïada na kane ka jingeh kaba khraw jong ka imlang sahlang.
