Shillong, Jylliew 13: Ka tnad Disaster Management ka Sorkar Jylla kala pynmih ïa ka jingbthah bad jingkyntu ïa ki paidbah ba kin long kiba phikir bha ïalade na ka jingther u slap, jingpom pyrkhat bad ka jingtied leilieh hapoh ka Jylla.
Kylleng ki bynta jong ka Jylla kila mad ïa ka jingïoh slap kaba jur bad ka jingpom pyrkhat ha kine ki khyndiat sngi bala leit noh, kaba la pyntngen ïa ka mariang na ka jingshit kyrang bad jingpum pum ha baroh kine ki bnai ba la leit noh.
Ha ka sngi Ba-ar, ka suiñ bneng kala sop da u lyoh bad ka jingther u slap ba jur ha ki katto katne ki bynta jong ka Jylla.
Kat kum ka kyrwoh ba la pyllait da ka Tnad DIPR, la pyntip antad ba katto katne ki jaka jong ka Jylla ki lah ban ïoh ïa u slap uba jur ha ryngkat u pyrthat.
Ka jingbthah kala kyntu ïa ki nongshong shnong ka Jylla ba kin bud ïa ki kyndon jingbthah ha kane ka samoi ba mynta.
Ki briew kiba im hajan jong ki Wah bad ki Wahduid la bthah ba kin da phikir bha ha kane ka aiom slap namar ka lah ban don ka jingwan kynsan ka umsaw ha kum kine ki jaka.
Ka la kyntu ïa ki paidbah ban kiar na ka jingleit sha la ki jong ki jaka, ban jam lyngba ki wah bad ban kiar jam na ki wahduid, ki nala bad ki culvert lem bad kiwei kiwei.
La bthah ïa ki briew ba kim dei ban niah ïa ki kali lyngba ki jaka ba shlei um bad ban kiar ruh ïalade na ki nar post elektrik khnang ba kin lait na ka jingshah lympat bording.
La bthah ïa ki Khynnah skul bad College ba kim dei ban jam lyngba na ki wah bad ki wahduid ha kane ka aiom ba jur slap.
Kumjuh ruh, la kyntu ïa ki nongshangkai pyrthei ba kim dei ban ïatur shajan jong ki Wah, ki wahduid bad ki kshaid haba ki wan jngoh ïa kine ki jaka shangkai pyrthei.
