Phi long kum ki syiem ha la ka jong ka kam, trei shitom ban pynroi ïa ka, ai mynsiem u MLA ïa ki nongrep ha ka iew pyninam ba shisngi

Nongpoh, K’Lyngkot 16: Shibynta ban kyntiew ïaka kam rep kam riang bad khamtam ban ai mynsiem ïaki nongrep, ka Agriculture Technology Management (ATMA), Ri-Bhoi District lyngba ka jingkyrshan lang ka Ministry of Agriculture and Farmers Welfare jong ka sorkar India, mynta ka sngi kala pynlong ïaka iew ki nongrep ba shisngi ne ka Kissan Mela naka bynta ki nongrep ka thaiñ Ri-Bhoi bad ïa katei ka iew la pynlong ha madan NSCA Pahamsyiem.
Ïa kane ka iew pyninam ki nongrep la plie paidbah da u Bah Mayral Born Syiem MLA ka Nongpoh kum u kongsan haka jingdonlang ka kong B Ranee ADC ka Ri-Bhoi District kum ka sybud kongsan, u Bah C. Shabong Director Research and Training, kong S. Chyne, District Agriculture Officer, P.J. Dutta, District Horticulture Officer, Bah M. Lyngdoh, Deputy Project Director, ATMA lem bad kiwei kiwei ki ophisar bad ki nongrep na kylleng ka thaiñ Ri-Bhoi.
Haba kren ha kane ka sngi naka liang ki nongmihkhmat ka ATMA kila pynshai ba ka jingthmu jong kane ka iew ka long ban ai mynsiem bad pynkhlaiñ ïaka kam rep kam riang lyngba ki buit thymmai katkum ka juk stad ba mynta ban nang pynmih khambun ki mar rep na kaba ju mih baroh shi katta ryngkat ka jingpynshlur ïaki nongrep ban kiar ka jingpyndonkam ïaki dawai haba ki thung ïaki mar rep ne ki jhur ki jhep namar ki jhur ba khlem dawai kim don jingktah haka met u briew.
Lyngba kane ka iew naka bynta ki nongrep, ka long ruh ka rynsan ïaki nongrep na kylleng ka dong Ri-Bhoi ba ki ioh ban pyninam ïaki mar rep mar riang jong ki bad ioh ruh ka jinghikai ba mar kylliang naki para nongrep kumno ban nang pynjanai ïaka kam rep kam riang bad ban nang pynroi ïaki kam rep kam riang bad ki kam ri jingri.
Naka liang u MLA ka Nongpoh u Bah Mayral Born Syiem haba kren ha kane ka sngi u la pynpaw ka jingkmen kaba khraw ban iohi ba ki nongrep ki don ka khmat kaba phuh samrkhie, namar ki nongrep ki long kum ki syiem bad ki kynrad hala ka jong ka kam, namar kum ki nongrep bunsien ki sngew ba ka kam rep kam riang ka dei tang ka kam kaba rit bad bun ki briew ki kheiñ poh ïaka hynrei lah ban ong ba ka kam rep kadei kaba khraw lada khlem ki nongrep kan don ka jingkyrduh bam kaba khraw haka ri bad ka pyrthei.
Shuh shuh ha kane ka sngi naka liang ka ATMA kila pynlong ruh ka jingïakop pyni nam ïaki mar rep bapher bapher bad la sam ruh ïaki khusnam sha ki nongrep kiba lah ban pynmih ïaki soh bad ki jait jingthung bapher bapher haka rukom kaba ihun.