Phi la ïohlad ha ka kam saiñpyrthei, ailad ïa ki rangbah ha kam shnong kam hima

Shillong, Jymmang 02 : U EM ba dei peit ïa ka Elaka ha KHADC, u Bah Jambor War, u la ong ba um ïahap satia ba aild ïa ki kynthei ba kin long ki nongïalam ha ki kam shnong kam thaw ne ki kam hima, namar ka long pyrshah ïa ka riti ka dustur jong u Khasi naduh hyndai hynthai.
Haba kren kum u Kongsan ha ka jingïalang ban pyllait ïa kot shaphang ka Phan Nonglait ba la ai kyrteng, “Ka Phan Nonglait, A Lady Freedom Fighter of India” dang shen, u Bah Jambor u la ong ba ki kynthei ki la ïoh la ka jong ka bhah ban long kum ki nongïalam ne kum ki nongmihkhmat ha ki kam saiñpyrthei bad ha kiwei kiwei de ki bynta. Hynrei u Khasi naduh hyndai u la pyrkhat sani bha ba ïa ka kam synshar shnong synshar thaw bad synshar it synshar Hima la buh bynta kyrpang tang ïa u shynrang. “Te nga kyntu ïa ki kynthei ba ki burom bad ailad ïa ki shynrang ba kin ïoh ïa kane ka bynta kaba la buh kyrpang”, u la ong.
U la pynpaw ïa kane da kaba ong ba ki don ki kynthei kiba la pynpaw ba ka por ka la dei ba ki kynthei ruh ki la lah ban long ki nongïalam ha ki kam shnong kam thaw katkum ka jingïaid jong ka por.
Ha shuwa jong kane, i Prof. Badaplin War jong ka NEHU, da kaba ring nuksa na ki kam shlur ka Phan Nonglait, i la ong ba ka por ka la ih ba ki kynthei ruh ki la lah ban long ki nongïalam ha ki kam shnong. “Kum ka jaidbynriew, ngi la pynmih ïa ki Kynthei kui i Kong Idashisha Nongrang, Addl. DGP ka jylla, Kong Rebecca Suchiang, Chief Secretary ka jylla bad kam don jingeh ba ki kynthei ki lah ban long ki nongïalam ha ki shnong ki thaw ruh”, i la ong.
Lah ban kdew hangne ba ha kine ki bnai kiba ladep, ki la don ki kynthei kiba la leit ai jingthoh sha ka KHADC ban pynpaw ïa ka jingangnud ba ki kynthei ruh kin long ki nongïalam ha ki kam shnong kam thaw.