Phi ki heh saipan phin poi sha London, ngi kiba duk ngin ïap na ka Radiation: HYC
Mawkyrwat, Risaw 12: Ka Hynñiewtrep Youths Council (HYC) South West khasi hills District ryngkat ka Hynñiewtrep Youths Council (HYC) Central Body ka la pynlong ïa ka jingïalang paidbah ban pyrshah ïa ka jingpynbna jong ka Sorkar India lyngba ka Office Memorandum halor ka jingthmu ban tih ïa u mawpoh khyndew Uranium.
Ha ka jingïalang ba la pynlong ha Ïew Umdohlun, u President ka Hynñiewtrep Youths Council (HYC) Bah Roykupar Synrem uba dei u la ong ba ka sorkar Meghalaya ka dei ban kren da kaba shai sha ka sorkar India ba ka dei ban khylliap noh ïa kane khana shaphang u marpoh khyndew Uranium namar kumba la ju bad ïeng tylli ki sengbhalang bad ki paidbah ha kaba ki la kren da kaba shai, “horkit hordang ka ngin nym ailad ïa ka sorkar India ban tih ïa u Uranium katba ngi dang ring mynsiem bad dang im ha kane ka sla pyrthei”.
U la ong ruh ba lada ka Sorkar Meghalaya ka pyrshah ban tih ïa u Uranium, ka dei ban pyni da ki kam ban pynpaw ïa ka jingpyrshah ïa ka Office Memorandum ba la pynmih da ka Ministry of Environment Forest & Climate Change jong ka Sorkar India ha ka 8 tarik Nailur, 2025 kaba ong, “ba ym donkam shuh ban pynsngew ne sngap paidbah lada donkam ban tih ïa u Uranium”.
Ka HYC ka phah ruh ïa ka khubor kaba shai sha ka sorkar jylla ba ka dei ban pyni da ka kam yn ban kren da ka ktien lyngba ki lad pathai khubor hynrei ka dei ban thoh sha ka Sorkar India ban ong, ban khang khyrdep noh ïa ka mat Uranium ha kane ka jylla Meghalaya bad dei ban rah ïa kane ha mat ha ïing Dorbar Thaw-aiñ ba ban pass da ka Resolution ba baroh 60 ngut ki MLA ki dei ban rai tang kawei ka sur ban ong, “Em ïa u Uranium”.
Kiwei kiba ai jingkren bad ai jingpynshai paidbah ki long u bah Enlang Sawian uba dei u Education Secretary, u bah Lumlang Kharsyiemlieh uba dei President HYC jong ka West Khasi Hills District, u bah Pynskhem Kharjahrin uba dei u President HYC South West Khasi Hills District, u bah Phrijone Lyngdoh Langrin khun jong i Mei-ieid Spelity Lyngdoh Langrin bad kiwei kiwei.