Phet sa kawei ka Kompeni ba shna ïa ka surok Shillong- Dawki ba leh sting ka sorkar

Shillong, Jylliew 23: Hadien ka jingphet noh ka kompeni SS Infrazone ban tih ïa ka sorkar Shillong-Dawki naduh Umshyrpi haduh Umdiengpun (Upper Shillong) mynta sa kawei pat ka Kompeni, kaba dei shna ïa ka surok ha ka bynta na Umsyiem haduh Tamabil ka la iehnoh ïa kane ka jingtrei ba ka ïoh.
Kane ka Kompeni kaba la ïoh kontrak ban shna ia kane ka bynta kaba kut jong ka surok Shillong- Tamabil, kadei ka Niraj Cement Structurals Limited, kaba ka lynter jong ka surok ba ka dei ban shna ka long kumba 7.9 KM eiei.
Haba la wad bniah ïa ki daw kiba kane ka kompeni ka iehnoh ïa ka jingtrei wat hadien ba ka la ïoh ïa ka tender, ki heh ka tnad PWD, ki ïathuh ba ka daw hi kaba kane ka kompeni ka phet noh ka dei na ki jyrwit jyrwat kiba mih na ka jingbym lah ka sorkar jylla bad ka ophis DC ban pynïoh ïa ka jaka ban ïaid kane ka surok.
Kat kum ka tyllong jingtip kaba thikna la ong ba kumba long mynta ki kyndon kiba kiwei ki tnad ka sorkar jylla ki dei ban pyndep ha shuwa ban ïoh pyntrei ïa kane ka surok la shuh pynsahteng la bun bun snem kum ka jingkhet noh ïa ki dieng da ka tnad khlaw ha ki jaka ba dei ban ïaid ka surok bad ka jingjyrwit jyrwat jong ka jingïoh khyndew ban pynïaid ïa kane ka surok.
Sna ka liang u Genral Manager jong ka National Highway Infrastructure Development Corporation Limited ruh u la ïathuh ba ka dei ka jingshisha ba ka Niraj Cement Structurals Limited ka la iehnoh ïa ka jingtrei bad u la ïathuh ruh ba shen ka tnad kan khot tender thymmai ynda kine ki jyrwit jyrwat la lah ban weng lut.
Shuh shuh u la ong ruh ba kum ki kompeni kim lah satia ban shuwan sah kai shane khlem da ïoh ban pyntrei ïa ka kam kaba ki dei ban pyndep namar ka jaka ba ki ïoh ban trei ruh ka long tang kumba 0.5 KM kaba ka sorkar jylla ka la ïoh ban ai sha ka sorkar pdeng ban pynïaid sha khmat ïa ka jingtih ïa kane ka surok.