Nongpoh, Naitung 26: Ka Federation of Khasi Jaintia and Garo People, North Khasi Hills District hapoh ka jingïalam jong u samla Ricky Majaw General Secretary, Samla Banroy Wahlang Asst. Information Secretary, u samla Lambha Kurbah President Umiam Circle lem bad ki dkhot mynta ka sngi kila leit ban khynra ïaki kot ki sla jong ki nongtrei bar jylla kiba trei ha LPG Bottling Plant jong ka Indian Oil Corporation Limited haka shnong Pyllun ha Ri-Bhoi District hadien ba kum ka seng kala lap bad iohi ïaka jingjyllei jong ki nongtrei bylla ha katei ka Plant.
Haka jingleit jong ka seng ban wadbñiah la kitei ki bar jylla ba trei bylla ha katei ka karkhana ki don ne em ïaki kot ki sla naduh ki labour license bad kiwei kiwei kila leit ban kynduh ïaki manage ba peit ïa katei ka jaka trei bad kila kular ban sei ïaki kot ki sla jong ki nongtrei hynrei kaba sngew lyngngoh ba ki khlem wan mih shuh wat hadien bun kynta bala ap da dkhot ka seng bad wat ki nongtrei kiba dang trei ha katei ka jaka ki shu jah klep bad phet rieh ïalade.
Ki nongïalam ka seng hadien bun kynta bala ap, kila leit sha ophis treikam jong ka IOCL ban ïakynduh ïaki bor ba dei peit hynrei kim lah ban pynshisha ïaki kot ki sla, bad wat ka bor shnong jong ka shnong Pyllun kila pynpaw ka IOCL kam shym la pynthymmai shuh wat ïaka NOC bala ai da ka Dorbar Shnong.
Haba kren sha ki lad pathai khubor naka liang u Samla Ricky Majaw u la pynpaw ba kum ka seng ka dap da ka jingsngewkhia kaba jur halor katei ka jingbym patiaw jong ka IOCL ban pynbiang ïaki kot ki sla ba donkam khamtam ki labour license jong ki nongtrei namar ka jingjyllei jong ki bar jylla kiba tuid sha kane ka jylla khamtam ka jingkhynra mynder jong ka jylla Assam kaba la pynlong ïaki dkhot ka seng ban peitngor.
Kum ka seng ka ai por 1 taiew ïaki bor ba dei peit ka IOCL ban pynbiang ïaki kot ki sla bad ruh ba ki dei ban pynsangeh shuwa ïaka kam katba kim pat lah ban pynbiang ïaki kot ki sla ba donkam khamtam ki labour license jong ki nongtrei.
Naka liang u Bah Anthony Passah Rangbah Shnong ka shnong Pyllun u la ong ba kum ka shnong ka ai ka jingkyrshan ïaka seng FKJGP kaba la shim ïa katei ka sienjam hadien ba kum ka seng kala lap ba kitei ki nongtrei kim lah ban pynshisha ïaki kot ki sla.
