Phet krad ka kali katba dang talasi kali ki Pulit ha Umnget, maham ïa ki nongñiah kali buaid

Nongpoh, Naiwieng, 18: Kawei ka kali Alto kaba don ïa u number AS 25 C 4525 kaba la pyndait da u tyndong pynsawa ka la phet krad syndon hadien ba ki pulit ki la phah sangeh bad phah law ïa u silencer, nalor ba ki kot ki sla katei ka kali ki la ïap lut bad tang hadien ka jingbat ki pulit katei ka kali ka la phet krad na katei ka jaka ban lait na ka jingshah talasi bad na ka liang ki pulit ki dang pynlong ka jingtohkit ïa katei ka kali bad ban leh ïa kaba donkam.
Ïa kane ka jingtalasi ki pulit ka Ri-Bhoi ki la pynlong ha ka thaiñ Umnget hapoh ka jingïalam u VS Rathore Senior Superintendent of Police ka Ri-Bhoi, Bah O Masar Addl. SP, u Rubul Ali In charge ka Nongpoh Traffic Branch, u K Islam OC Ka Umsning Police Station Lem bad kiwei kiwei.
Kane ka jingtalasi ki pulit khamtam ha katei ka jaka kaba don bun ki wine shop, ka dei ruh ka jingbteng ban tehlakam ïa ki briew kiba ju mlien ban pynkheiñ aiñ kaba ju wanrah bun ki jingjia ba sngewsih bad ki jingmynsaw tang na ka daw ka jingdon ki briew kiba pynkheiñ aiñ.
Lah ruh ban kdew hangne ba ki pulit ka Ri-Bhoi na ka por sha ka por ki ju pynlong ka jingtalasi bad lap ruh bun ki nongpynkheiñ aiñ ha kaba ki la maham ruh ïa ki paidbah ryngkat ka daiñ kuna hynrei katba ki pulit ki dang maham bun na ki paidbah kim pat patiaw satia ha kaba dang lap shibun ngut ki paidbah kiba bat ïa u steering bad u bilor kyiad, kiba ñiah khlem pyndonkam seat belt, ki bym phong helmet bad kumjuh ruh ki trok kiba ju mlien ban ïaid na ka liang ka mon u surok.
Na ka liang ki pulit ki la daiñ kuna naphang kum ka jingpynpei shkor ïa ki paidbah ba ki dei ban burom ïa ki aiñ ñiah kali namar kim dei ban lehkai ïala ka jingim bad ka jingim kiwei de, namar tang ka jingleh khlemakor jong ki katto katne shibun ki mynsiem ba lui lui ki duh noh ïala ka jingim.
Lyngba kane ka jingbteng jong ki pulit ban talasi na ka por sha ka por bad ka jinghiar madan hi u heh pulit ka Ri-Bhoi, lah ban kdew ba ki jingjia aksiden ki la hiar arsut ha Ri-Bhoi bad bun na ki paidbah ki la sdang ban bud ryntih ïa ka jinghikai bad ka jingmaham ki pulit.