Phai noh na ki awria, jingdih pynbuaid, kylla kaba mut: Rev Wanchwa Dame Suting

Nongstoiñ, K’lyngkot 19: Ka jingïaseng samla jong ka Balang U Blei Meghalaya & Assam ïa kaba la tip kum ka 35th Annual Youth Assembly, ha ka sngi U Blei jong ka taïew ka la ïoh ban pynkut noh lyngba ka jingïaseng paidbah ïa kaba la pynlong ha madan Siejlieh Nongstoiñ West Khasi Hills District.
Ïa katei ka jingïaseng kyrpang jong ki samla kaba la neh haduh lai sngi lynter, la sdang naduh ka 16 tarik u Kyllalyngkot 2026 bad la pynkut noh pat ha ka 18 tarik u Kyllalyngkot 2026 lyngba ka jingïaseng paidbah.
Ha ka jingïaseng paidbah, la ïohi ba da ki hajar ngut ki riew ngeit Khristan ki la ïatuid sha katei ka jingïaseng kaba la pyndap ruh da ka jingpynkhih U Mynsiem Bakhuid, ha kaba bun ngut ki la leit ban phah duwai ha ki nongsharai kaba long ruh kum shibynta ban aiti ïa la ka jingim sha U Blei ban ïoh ïa ka jingpynthymmai ka Mynsiem.
Ha ka jingïaseng kaba nyngkong la ïoh ban pharia ïa ka Ktien U Blei da u Rev Nicodemus Thangkhiew. Katba ha ka jingïaseng nohphai sngi pat u Rev Wanchwa Dame Suting, u la ïoh ban sam ïa ka Ktien jong u Blei ha kaba u la wer ruh ïa ki samla ba kin phai noh na ki jingawria, na ki jingdih pynbuaid bad na ki jingsngewbha pyrthei sha ka jingkylla bamut bad ban pynkhreh ban ïakynduh bad u Blei.
Kumba u Amos u la kit ïa ka lyngkor u Blei, hato ki samla ki kit ïa kaei ko ki samla, ki jingawria, ki jingijli, ki jingïapynïap, ki jingtuh ki la jia kum ha ka por u Amos, ong utei u Rev da kaba pynshong nongrim ïa katei ka khubor da kaba sot na ka kitab u Amos lynnong kaba 4 bad ka dkhot kaba 12.