Phai khmat sha ki 3 tylli ki T bad pynshlur ïa ki jingpynmih na lade : PM sha ki CM

Shillong, Nailar 07 : U Myntri Rangbah duh ka Ri u Narendra Modi mynta ka Sngi U Blei u la ban jur ïa ki Myntri Rangbah jong ki jylla bad ki Union Territory ba kin phai khmat sha ki lai tylli ki T kata Trade( Khaïi pateng) Tourism (Kam jngoh kai pyrthei) bad Technology ( Ki kor ki bor teknoloji ka juk mynta) bad ha kajuh ka por ba kin pynshlur bad pyndonkam ruh ïa ki mar ki mata kiba pynmih na la ki jylla da kaba pynduna ka jingthied jingpet na shabar ka jylla ne sha bar ri ruh kumjuh.
Haba kren ha ka jingïalang jongka Governing Council jongka NITI Aayog kaba Hynniew mynta ka sngi ha nongbah Delhi kaba u long kum u Shongknor jongka Council, u la ong “ Kine ki lai tylli ki T ki dei kiba donkam tam ha kino kino ki mission jongka ri India hakhmat ka pyrthei”.
U la ong ki jylla kin kham pynduna ka jingthied na shabar ri bad ki dei ban pynjur ka jingshalan shabar ri bad kumjuh ruh ban pyndonkam beit da kiei kiei ki mar ki mata ba pynmih napoh ki jylla hi. “ Ngi dei ban pynshlur ïa ki nongshong shnong ba kin pyndonkam da ki mar ki mata bad ki tiar ki tar ba pynmih na lade hi” ong u Modi.
Haba kren shaphang ka jingpyrshang ban pynkhlaiñ ïa ka khaïi pateng bad ka ïoh ka kot jongka ri u Modi ula ong wat la ka jingioh lum khajna GST ka la kiew bha hynrei dang donkam shuh shuh ban nang pynkhlaiñ ïa ka jinglum.
Ha ka jingpyllait khubor na ka Niti Aayog la pynpaw ba u myntri rangbah ula kren lut halor kiba bun ki mat ha kane ka jingïalang da kaba u shim kyrpang ïa ka jingkyntiew ïa ka rep ka riang, ka kam ri jingri, ka jingpynmih ïaki mar bam khnang ba ka rep ka riang kan kiew bad ba ka India kan long ka ri kaba kiew bha ha kane ka liang hakhmat kiwei ki ri ka pyrthei.
U Modi u la ong “ Ka jingroi jong ki shnong ki thaw, ki sor ka la long kawei na ki daw ba kyntiew bha ïaka India bad kane ka long beit lyngba ki kor ki bor teknoloji.
U la ong baka jingkhlaiñ bad jinglong kawei jongka India ka paw ha ka por jongka khlam COVID ha kaba ka India ka la long kum ka nuksa ïa kiba bun ki ri bad ka daw bah ka dei na ki jylla kiba shim khia ban pynpoi ïa ki lad jingïarap shaduh ki paidbah khlem da kheiñ ne niewtang ïa ki kam saiñ pyrthei hynrei la ïatrei lang beit kawei ka mynsiem jingïatylli da kaba buh shadien ïa ki jingiapher party.
Kane ka long ka jingïalang kaba nyngkong eh jongka Niti Aayog ba u Myntri Rangbah un ïakynduh markhmat bad ki Myntri Rangbah naduh ba sdang ka khlam COVID. Ha kane ka jingïalang la ïadon ryngkat 23 ngut ki Myntri Rangbah, 3 ngut ki Lt Governor bad bun ki Myntri sorkar pdeng.
Ka jingialang ka la ïa kren sani bha halor ka jingkyntiew ïa ka rep ka riang bad ka jingpyntreikam ïa ka National Education Policy (NEP) haki skul bad ki College.
ïa kane ka jingïalang la pynlong mynta ka sngi ha Rashtrapati Bhavan Cultural Centre New Delhi.