Phah u Lat ïa ka kynhun ba nyngkong ban leit pyntbit ha ki jaitkam bapher bapher jong ka AYUSH

Shillong, Risaw 19 : U Lat ka Jylla u CH Vijayashankar ha ka sngi Saitjain u la phah ïa ka thup ba nyngkong jong ki samla pule na Meghalaya kiban leit pyntbit ha ka Skill Development Program ha ki jait kam bapher bapher kiba hap hapoh ka AYUSH. Kane ka prokram kadei shi bynta jong ka sienjam ba la shim da ka Santhigiri Ashram lyngba ka jingkyrshan jong ka Zerodha lyngba ka Corporate Social Responsibility (CSR).
Kane ka sienjam kadei ka jingsdang jong ka kam kaba khraw kaban ai jingmyntoi ïa ki hajar hajar ngut ki khun samla na ka thain shatei lam-mihngi jong ka Ri kaban kynthup lang naduh ka Meghalaya, Assam bad Arunachal Pradesh ki jylla kiba la kiew stet ha ka AYUSH.
Da ka jingdonlang jong u Lat ha kane ka sngi ban phah ïa kine ki samla sha ki jaka ai jinghikai, ka la ai mynsiem haduh katta katta ïa ki khun samla kiba don ïa ka thong kaba khraw ha ka jingim jong ki.
Kane ka prokram kadei ruh kaba ïaid ryngkat lang bad ka Skill India bad Atmanirbhar Bharat Mission, kaba pynleit ban thaw ïa ki lad ban ïohkam ïohjam hapoh ri India kaba la kiew ha ka liang ban ai jingsumar bad ka jingai ïa ka jingsumar bad ïa ki dawai tynrai.
Kane ka prokam kan ym dei tang ban shu ai jinghikai pyntbit hynrei yn kyntiew ruh ïa ka rukom kren ïa ka ktien phareng, ban tei ïa ka jinglong shimet bad ka jingai jinghikai ha kaba ïadei bad ka rukom pyndonkam ïa ka pisa pilain bad kiwei kiwei kaban pynkup bor ïa kine ki samla ba kin lah ban jop bad longbriew manbriew ha kane ka juk stad mynta.