Tura, Jymmang 4 : Hadien ka jingïakynduh lang ki trai Bus, u SP, DC, District Transport Office bad ka Meghalaya Transport Corporation Ltd (MTC) ha ka 11 tarik Iaiong 2022 na ka bynta ban pyntreikam pura ïa ka Inter State Bus Terminus (ISBT) ha Chasingre, u DC ka West Garo Hills u Ram Singh u la pynmih ka hukum ba baroh ki Bus kiba wan sha nongbah Tura mynta ki dei ban sangeh bad ïeng noh ha ISBT bad yn ym shah wat tang ïa kawei ruh ka Bus ban wan kiew sha sor Tura.
U DC ula pynbna ïa kane ka jingbthah hadien ba la ïohi ba kat haduh mynta ki dang don beit ki bus kiba dang ïaid ha sor Tura bad kiba dang pynïeng ruh ha ka jaka ïeng bus kaba hajan ka surok bah PWD bad ki ïing sah briew bad kine ki bus ki la long ka jingpynwit bad pynthut ïa ka leit ka wan kiwei ki kali bad ki wanrah ruh ïa ka jingdheng kali kaba jur bha.
Kumta khnang ban duna ka jingdheng kali ha nongbah Tura naduh mynta ka sngi la hukum tyngeh ba ki bus ki dei ban ïeng beit ha ka ISBT kat kum ka hukum jongka Supreme Court khnang ban lait na kino kino ki jingjia aksident ne jingma ïa ka jingim briew. La bthah ïa u DTO bad ïa u President/ Secretary jongka West Garo Hills Bus Association ba kin peit ba baroh ki nongñiah bad ki trai bus kim dei shuh ban dang leh tam ne ïaid lait ïa ka hukum ba la pynmih da u DC ban pynïeng beit ïa ki bus ha ISBT. Kane ka hukum kan treikam tad haduh ban da pynmih da kumwei pat ka hukum.
